لەپەیوەندییەكی تەلەفۆنیدا لەگەڵ ئەحمەد شەرع، سەرۆكی كاتی سوریا، ڤلادیمیر پوتین، سەرۆكی روسیا جەختی لە سەروەری و یەکپارچەیی خاکی سوریا كردوەتەوە.

هەواڵ: (KNNC)

ئەمڕۆ چوارشەممە، كۆشكی كرێملین بڵاویكردەوە، ڤلادیمیر پوتین، سەرۆکی روسیا پەیوەندییەکی تەلەفۆنی لەگەڵ ئەحمەد شەرع، هاوتا سورییەکەی ئەنجامداوە كە تیایدا گفتوگۆ لەسەر دۆخی ئێستای سوریا و هەڵوێستی روسیا لەسەر ئەو وڵاتە كراوە.

ئاماژەی بۆ ئەوەشكردوە، سەرۆكی روسیا پشتیوانی خۆی بۆ یەکپارچەیی سوریا و سەروەری خاكەكەی دەربڕیوە و هیوای سەرکەوتنی لە چارەسەرکردنی كێشەكان و ئەو ئەرکانەی لەسەرشانی سەرۆكی كاتی سوریادایە خواستوە.

رونیكردوەتەوە كە سەرۆكی روسیا، هیوادارە لە بەکارهێنانی بنکە دەریایی و ئاسمانییەکانی لە سوریا بەردەوامبن، كە ئەوانیش لە بنکەی دەریایی تەرتوس و بنکەی ئاسمانی حمەیمیم پێكهاتون.

كۆشكی كرێملین ئاشكرایكردوە كە، پوتین ئامادەیی وڵاتەكەی بۆ باشتركردنی دۆخی سوریا و هاوكاریكردنی ئەو وڵاتە دەربڕیوە بەتایبەتی پێشکەشکردنی هاوکاری مرۆیی.

پێشتر و لەسەردەمی رژێمی بەشار ئەسەد، روسیا پشتیوانێکی سەرەکی مانەوەی سەرۆكی لەكاربراوی ئەو وڵاتەی كردوە کە لە کانونی یەکەمی ساڵی (2023)ـوە لەلایەن هێزەکانی ئۆپۆزسیۆنەوە لە پۆستەکەی دوورخرایەوە و ئێستا لە مۆسكۆ دەژی.