بەرپرسێکی پەکەکە رایگەیاند، هەرکات ڕێبەرەکەیان ئازاد بکرێت، دانوستان و ئەو هەنگاوانەی کە دەنرێن، قبوڵ دەکەن دەشڵێت، ڕەنگە هەندێک بابەت تەنها بە بانگەوازەکەی عەبدوڵا ئۆجەلان چارەسەر نەبێت.

هەواڵ:KNNC

نەدیم سەڤەن، ئەندامی کۆمیتە ناوەندی پەکەکە لە چاوپێکەوتنێکدا لەگەڵ میدیای نزیک لە حیزبەکەی ڕایگەیاند، هەتا عەبدوڵا ئۆجەلان ڕێبەری پەکەکە ئازاد نەکرێت، ئەوان هیچ شتێک قبوڵ ناکەن و هەرکاتیش ئازاد کرا، دانوستان و هەنگاوەکانی دیکەی چارەسەری قبوڵ دەکەن. 

بەرپرسەکەی پەکەکە سەبارەت بە بانگەوازی ئۆجەلان لەم مانگەدا ئاماژەی بەوەشکرد، پەیامەکەی بۆ ئەوان چارەنوسساز و یەکلاکەرەوەیە و وتیشی، ڕەنگە هەندێک بابەت تەنیا بە بانگەوازەکەی ئۆجەلان چارەسەر نەکرێت. 

باسی لەوەشکرد، نابێت پڕۆسەکە تەنیا بە چونی شاندی دەمپارتی بۆ ئیمراڵی و کۆبونەوەکان و لێدوانەکانی ئاکپارتیەوە سنوردار بکرێت، ئەگەر حکومەت دەیەوێت پرسەکە چارەسەر بکات دەبێت نەخشەڕێگایەک بۆ ئاشتی ئامادە بکات.

دەشڵێت، ئەوان تەنیا حیزب نین، بەڵکو ڕێکخراون و هەم لەسەر ئاستی کوردستان و ڕۆژهەڵاتی ناوەڕاست و هەمیش لەسەر سیاسەتی جیهانی کاریگەرییان هەیە.