بۆ یادى 8ـى مارس، ئافرەتانى بزوتنەوەى گۆڕان وێڕاى پیرۆزبایی لە ژنان و کچان لە کوردستان و جیهان، جەخت دەکەنەوە کە ژنان لە هەرێمى کوردستان بەشداریان لە قۆناغە جیاوازەکانى خەبات کردوە، بەڵام هەلومەرجى گونجاویان بۆ نەڕەخساوە لەسایەى ئەو خەباتەیاندا ژیانێکى شکۆمەندانە بژین.

لە پیرۆزباییەکەیاندا، ئافرەتانى گۆڕان داوا دەکەن حکومەتی هەرێمی کوردستان و دەزگا گشتییەکان کار بۆ دەستەبەرکردنی مافەکانی ئافرەتان بکەن و کەموکوڕییە دادییەکان چارەسەر بکەن.

دەقى پیرۆزباییەکەى ئافرەتانى بزوتنەوەى گۆڕان:

بۆ یادی 8ـی مارس، بەناوی ئافرەتانی بزوتنەوەی گۆڕان، پیرۆزبایی گەرم لە سەرجەم کچان و ژنانی کوردستان و جیهان دەکەین .

8ـی مارس یادێکی جیهانیە، رۆژێکی سیمبولی خەبات و تێکۆشانی ژنانە، لە بەرامبەر ستەم و زوڵم و نادادی و نایەکسانیدا .

بەرز ڕاگرتنی 8ـی مارس، واتە بەرز ڕاگرتنی خەبات و تێکۆشان و هەوڵی ژنان لە جیهان دا، هاوکات ژنان لە کوردستان سەرەڕای بەشداریکردنیان لە قۆناغە جیاوازەکانی خەباتی سیاسی و شۆڕشدا، بەڵام بەداخەوە هەلومەرجی سیاسی و دارایی و ئابوری و کۆمەڵایەتی بواری بۆ نەڕەخساندن لە سایەی ئەو تێکۆشانەیاندا دەستەبەری ژیانێکی شایستە و شکۆمەندانە بکەن.  

لەڕوی کارگێڕی و داراییەوە وڵات دەناڵێنێ بەدەست گەندەڵی و قەیران و نەبونیی و هەژارییەوە، ژنانیش لە کاریگەریی ئەم قەیران و کەموکورتیانە پشکی شێریان بەرکەوتوە، گرفتی بێکاری و خراپی گوزەران و نەبونی رێژەیەکی باڵا لە دانیشتوانی هەرێمی کوردستانی گرتوەتەوە، کاریگەریی نەرێنی لەسەر پێگەی ژن و خێزان  دروست کردوە، هەروەها لەڕوی بەشداری کۆمەڵایەتی و دەستەبەری خوێندن و دابینکردنی خوێندنی خۆڕایی و تەندروستی گشتی و بەشداری لە کایەی سیاسی، بەهۆی گرفتەکانی جیاکاری و نادادپەروەری لە نێوان هاونیشتیمانیان و نەبونی چەسپاندنی چەمکی هاوڵاتیبون و جیاوازی کردن لە نێوان ئاست و گروپە جیاوازەکان، کاریگەریی لەسەر نائومێدکردنی ژنان دروستکردوە،  کە هەست بە نادادی کۆمەڵایەتی بکەن .

تەنانەت لە ئاستە باڵاکانی بەڕێوەبردن و لە ناوەندەکانی بڕیار کچان و ژنان بونیان هەبێت، پێویستە پەرلەمان و حکومەتی هەرێمی کوردستان کار بکەن بۆ دەستەبەرکردنى مافەکانى ژنان، هەربۆیە داوا لە پەرلەمان دەکەین پلانیان هەبێت لە چوارچێوەی پەسەندکردن و  هەمواری یاساکان چارەسەری کەموکوڕییە دادیەکان بکەن.

جەختیش دەکەینەوە حکومەتی هەرێمی کوردستان و دەزگا گشتییەکان کار بۆ دەستەبەرکردنی مافەکانی ئافرەتان لەڕوی  دابینکردنی هەلیکار و دامەزراندن و تەندروستی بە خۆڕایی و کەمکردنەوە و نەهێشتنی توندوتیژی کۆمەڵایەتی و سەربەخۆکردنی دادگاکان دور خستنەوەیان لە دەستێوەردانی دەسەڵاتداران و بەرزکردنەوەی ئاستی خوێندنی باڵا بە خۆڕایی و پەروەردەکردن و هۆشیارکردنەوە و بەرزکردنەوەی ئاستی رۆشنبیریی ئەرکیانە لە پێناو بەرزکردنەوەی ئاستی بەشداری ژنان لە هەمو کایەکانی ژیان .

لە کۆتایدا، بەرز و شکۆداربێت خەباتی ئافرەتان، بۆ بەدیهێنانی کۆمەڵگایەکی دادپەروەر .

ئافرەتانی بزووتنەوەی گۆڕان
8ـى مارس-ى 2025