وەزارەتی دەرەوەی عێراق رایدەگەینێت: بەتوندی هێرشەكانی سوپای ئیسرائیل بۆسەر هاوڵاتیانی كەرتی غەززە ئیدانە دەكات و داوا لە كۆمەڵگەی نێودەوڵەتی دەكات كار بۆ كۆتایی هێنانی پێشێلكارییەكانی ئەو وڵاتە و پارێزگاری كردن لە گیانی هاوڵاتیانی مەدەنی بكەن.


هەواڵ: (KNNC)


لەسەر دەستپێكردنەوەی هێرشەكانی ئیسرائیل بۆ سەر كەرتی غەززە، وەزارەتی دەرەوەی عێراق راگەیەندراوێكی بڵاوكردەوە كە تیایدا هاتوە؛ بەتوندترین شێوە ئیدانەی هێرشەكانی ئیسرائیل بۆ سەر هاوڵاتیانی مەدەنی و بێ دیفاعی خەڵكی غەززە دەكەن كەلە ئەنجامی هێرشەكەی دوێنی شەودا زیاتر لە (404) گیان لەدەستدان و برینداربونی (562) كەسی دیكەی لێكەوتوەتەوە كە ژمارەیەكی زۆری قوربانییەكان لە ژن و منداڵ پێكهاتون.

راشیگەیاندوە: ئەم هێرشە سەربازییەی ئیسرائیل بۆ سەر كەتی غەززە و دانیشتوانەكەی پێشێلكاریەكی ئاشكرای یاسا نێودەوڵەتی و مرۆییەكانە، كە ئەوەش درێژكراوەی هێرشە بەرداوامەكانی سوپای ئەو وڵاتەیە بۆسەر فەلەستینییەكان و جێبەجێ كردنی سیاسیەتی سەركوتكردن.

وەزارەتەكە داوای لە کۆمەڵگەی نێودەوڵەتی دەكات كە، بەرپرسیارێتی ئەخلاقی و یاسایی لە ئەستۆ بگرن  و هەنگاوی بەپەلە بۆ کۆتاییهێنان پێشێلکارییەكان و پاراستنی هاوڵاتیانی مەدەنی فەلەستینی بگرنەبەر.

وەزارەتی دەرەوەی عێراق ئاماژەی بۆ ئەوەشكردوە، کۆماری عێراقی جەخت لە پاڵپشتی خۆی بۆ گەلی فەلەستین دەردەبڕێت بۆ گەیشتن بە ئازادی و مافە رەواکانیان لەوانەش مافی چارەی خۆنوسین و دامەزراندنی دەوڵەتی سەربەخۆ.