بەڕێوەبەرایەتی هاتوچۆی گەرمیان لەسەر حاڵەتێك هۆشداری بە شۆفێران دەدات و دەڵێت: دەست بەسەر ئۆتۆمبیلەكەدا دەگرێت و روبەڕوی سزای دارییان دەكاتەوە.


هەواڵ: (KNNC)

بەڕێوەبەرایەتی هاتوچۆی گەرمیان بڵاویكردەوە؛ هەندێ حاڵەت پەیدا بوە کە شوفێر تابلۆی دواوەی ئوتۆمبێلەكەی لێدەکاتەوە، بۆ ئەوەی لە کامێرای تیژڕەوی تۆمار نەکرێن، هاوڵاتیانیش وێنەیان بۆمان دەگرن و ئێمەش رێوشوێنی یاسایی توندیان لەبەرامبەر دەگرینەبەر.

بەڕێوەبەرایەتییەكە هۆشداری بە شۆفێران دەدات كە؛ هەر شوفێرێک بەو حاڵەتەوە بگیرێت،  دەست بەسەر ئۆتۆمبێلەکەیدا دەگیرێت و روبەڕوی سزایەکی دارایی توند دەکرێتەوە.

هاتوچۆی گەرمیان ئاماژە بۆ ئەوەدەكات، خۆتان لەو جۆرە سەرپێچییە بەدور بگرن، چونکە ئەگەر نەکەونە بەر چاوی ئەفسەر و کارمەندانی هاتوچۆ، هەزاران هاوڵاتی بەرپرس و هاوکار هەن کە وێنە و ڤیدیۆتان دەگرن رەوانەی هاتوچۆی گەرمیانی دەكەن، بۆیە بۆ سەلامەتی خۆتان و شوفێرانی دیکە، پابەندی رێنماییەکانی هاتوچۆ بن.