لە عێراق زیاتر لە 17 هەزار کەس بێ ئەوەى ئاگاداربن توشى بەرزى فشارى خوێن بون، ئەمەش لەڕێی هەڵمەتێکەوە کە وەزارەتى تەندروستى رایگەیاندوە ئاشکرا بوە.

هەواڵ:KNNC

سەیف بەدر، وتەبێژى وەزارەتى تەندروستى عێراق، رایگەیاند؛ هەڵمەتێکى نیشتیمانیی بۆ پشکنینى بەرزى فشارى خوێن ئەنجامدراوە و بەشێوەیەکى هەڕەمەکى لە بازاڕ و شوێنە گشتى و دامەزراوە جیاوازەکان پشکنین بۆ هاوڵاتییان کراوە.

ئاماژە بۆ ئەوەکراوە، هەڵمەتەکە 100 رۆژى خایاندوە و لەو ماوەیەدا پشکنین بۆ زیاتر لە 196 هەزار کەس ئەنجامدراوە و لەو ژمارەیەش 17%یان پێشتر توشى بەرزى فشارى خوێن بون و 11%شیان توشى ئەو نەخۆشییە بون بێ ئەوەى ئاگاداربوبن کە ژمارەیان زیاتر لە 17 هەزار کەس بوە.

جەختیشیکردوەتەوە، ئەم هەڵمەتانە بۆ زانینى پێشوەختەى بەرزى فشارى خوێن لە تەواوى عێراق بەردەوامیی دەبێت و داواشى لە هاوڵاتییان کردوە پشکنین بۆ بەرزى فشارى خوێن و بەرزى شەکرە ئەنجامبدەن و هاوکارى تیمە تەندروستییەکانیش بن.