ئەنجومەنی باڵای دانیشتوان تایبەت بە سەرژمێرى داهاتوى دانیشتوان کۆمەڵێک بڕیارى دەرکرد و بەپێی یەکێک لە بڕیارەکانیش لە عێراق و هەرێمى کوردستان دوو رۆژ قەدەغەى هاتوچۆ رادەگەیەنرێت.

هەواڵ:KNNC

نوسینگەى راگەیاندنى محەمەد شیاع سودانى، سەرۆکی ئەنجومەنی وەزیران  بڵاویکردەوە؛ ئەمڕۆ سێهەمین کۆبونەوەى ئەنجومەنى باڵاى دانیشتوان بەڕێوەچو بەمەبەستى تاوتوێکردن و بەدواداچون بۆ ئەو سەرژمێرییەى بڕیارە مانگى تشرینى دوەم بەڕێوەبچێت.

لە کۆبونەوەکەدا ژمارەیەک بڕیار پەسەند کران بەمەبەستى ئاسانکاریی بۆ پرۆسەى ئامادەکاریی و راهێنان بەمشێوەیە:

■ سەپاندنی قەدەغەی هاتوچۆ لە سەرجەم پارێزگاکانی عێراق لە رۆژانی 20 و 21 ی تشرینی دوەم بۆ ئەنجامدانی سەرژمێری.

■ چارەسەرکردنی داواکارییەکان لەگەڵ حکومەتی هەرێمی کوردستان سەبارەت بە راهێنانی کارمەندانی ئاماری بۆ پرۆسەی ژمارەدانان و ژماردن.

■ پاڵپشتیکردنی هەردو وەزارەتی پەروەردە و خوێندنی باڵا و توێژینەوەی زانستی بۆ پرۆسەی ئاماری لەڕێگەی ئامادەکردنی هۆڵاکانی خوێندنەوە بۆ راهێنان، هەروەها سەنتەرەکانی گەنجان لەڕێگەی وەزارەتی وەرزش و لاوانەوە.

■ خێراکردن لە گواستنەوەی پێداویستییە داراییەکان و تەرخانکراوەکان بۆ دارایی کردنی پڕۆژەی سەرژمێری.

■ میوانداریکردنی سەرۆکی دەستەی ئامار و سیستمی زانیاری جوگرافی لەکۆبونەوەی لیژنەی باڵای هەماهەنگی نێوان پارێزگاکاندا.