وەزیرى ئاسایشى نیشتیمانى ئیسرائیل رایدەگەیەنێت؛ لەڕێی هێرشکردنەسەر ئێرانەوە، دەرفەتیان هەیە سەرى مارەکە پان بکەنەوە.


هەواڵ:KNNC

ئیتمار بن غەفیر، وەزیرى ئاسایشى نیشتیمانى ئیسرائیل رایگەیاندوە کە لەڕێی هێرشکردنەسەر ئێرانەوە دەتوانن سەرى مارەکە پان بکەنەوە و بنیامین نەتەنیاهۆى سەرۆک وەزیرانیش کاردەکات لەسەر دەرکردنى بڕیارێکى ئازایانە.

هەروەک رۆژنامەى واشنتۆن پۆستى ئەمەریکى لە زارى چەند بەرپرسێکى ئیسرائیلەوە رایگەیاندوە کە نەتەنیاهۆ ئامادەیی خۆى بۆ وەڵامدانەوەى ئێران گەیاندوەتە ئەمەریکا و وتویەتى: لە ئامانجە سەربازییەکان دەدەم نەک ئەتۆمی و نەوتییەکان.

جەختیشکراوەتەوە کە وەڵامەکەى ئیسرائیل پێش بەڕێوەچونى هەڵبژاردنى سەرۆکایەتیی ئەمەریکا دەبێت لە 5ـى ئۆڤەمبەر.

تا ئێستاش دۆخى رۆژهەڵاتى ناوەڕاست ناجێگیرە، گرژییەکان بەردەوامییان هەیە و شەڕ لە ناوچەکە ساڵێکە درێژەى هەیە، ئیسرائیل لە لوبنانەوە هێرش دەکاتەسەر حیزبوڵا و لە غەززەش بزوتنەوەى حەمماس، لە ئێستاشدا هەڕەشەکانى بۆ وەڵامدانەوەى ئێران درێژەیان هەیە.