دەزگای نیشتمانی دانیشتوانی ئێران ڕایگەیاند، ساڵانە لە وڵاتەکە نزیکەی 540 هەزار کۆرپەلە بە شێوەیەکی یاسایی و نایاسایی لەبار دەبرێن.

هەواڵ:KNNC

دەستەی نیشتمانیی دانیشتوانی ئێران بۆ کاروباری چاودێریی سەبارەت بە بەرزبوونەوەی ڕێژەی لەباربردنی کۆرپەلەکان ڕایگەیاند، ساڵانە نزیکەی 10 هەزار منداڵ لە ئێران بە شێوەیەکی یاسایی و بە مۆڵەتی پزیشکی لەبار دەبرێن.

ئاماژەی بەوەشكردوە، بەپێی توێژینەوەی زانستی و ئاماری فەرمی وەزارەتی تەندروستی، ساڵانە 530 هەزار منداڵ (کۆرپەلە) لەڕێگەی نایاساییەوە لەباردەبرێن و ئەمەش بارگرانییەکی گەورەیە و ساڵانە دوو تریلیۆن تمەن بۆ ئەو بابەتە خەرج دەکرێت.

هاوکات وەزارەتی تەندروستی ئێران دەڵێت، لە 95% ی کۆرپەکان بە شێوەیەکی نایاسایی ئەنجام دەدرێن و تەنها لە 5% ی کۆرپەکان بە شێوەیەکی یاسایی و مۆڵەت پێدراو ئەنجام دەدرێن.

ئەمە لەکاتێکدایە کە حکومەتی ئێران هۆکاری زیادبونی کۆرپەکان دەگەڕێنێتەوە بۆ پەیوەندی نایاسایی ژن و پیاو، بەڵام پەرلەمانی ئێران دەڵێت، تەنیا 7٪ی کۆرپەکان دەگەڕێنەوە بۆ ئەو پەیوەندییانە و 93٪ی کۆرپەکان دەگەڕێنەوە بۆ ناو خێزان.