تەندروستی غەززە ئاشكرایكرد، لەسەرەتای دەستپێکردنی جەنگی نێوان بزوتنەوەی حەماس و ئیسرائیل نزیكەی هەزار پزیشک و كارمەندی تەندروستی گیانیان لەدەستداوە.


هەواڵ: (KNNC)


ئەمڕۆ شەممە، وەزارەتی تەندروستی کەرتی غەززە رایگەیاند: لەسەرەتای دەستپێكردنی جەنگی نێوان بزوتنەوەی حەماس و سوپای ئیسرائیل لە (7ـی تشرینی یەكەمی 2023) هێزەکانی ئیسرائیل نزیكەی هەزار پزیشک و كارمەندی تەندروستیان کوشتوە و زیاتر لە (350) كارمەندی دیكەی تەندروستیان دەستگیركردوە كە ژمارەیەكیان لە گرتوخانەكانی ئەو وڵاتە گیانیان لەدەستداوە.


ئەوەیخستوەتەڕو، لە ئەنجامی سێ هێرشی سوپای ئیسرائیل لە (24) كاتژمێری رابردودا (31) كەس گیانیان لەدەستداوە كە (10) كەسیان ئەندامی یەك خێزانن، هەروەها زیاتر لە (70) كەسی دیكەش برینداربون.


ئاشكراشیكردوە، كۆی گشتی قوربانیانی جەنگی نێوان حەماس – ئیسرائیل بۆ (152) هەزار و (800) كەس بەرزبوەتەوە كە (45) هەزار و (227) گیان لەدەستدان و برینداربونی (107) هەزار و (573) كەسی دیكەی لێكەوتوەتەوە.


لای خۆشیەوە، بەرگری شارستانی كەرتی غەززە ئاماژەی بۆ ئەوەكردوە، بەهۆی بەردەوامی هێرشەكانی سوپای ئیسرائیل تا ئێستا نەتوانراوە تەرمی هەزاران هاوڵاتی لە ژێر باڵەخانە روخاوەكاندا دەربهێنرێتەوە.