لە كەشێكی باراناویدا دەهەمین ڤیستیڤاڵی هەنار و پایزی هەڵەبجە كۆتایی هات و ئامادەكارانیش ئامارەكانی سێ رۆژەی ڤیستیڤاڵەكەیان راگەیاند كە (285) هەزار گەشتیار و سەردانیكار سەردانی پارێزگاكەیان كردوە كۆی گشتی داهاتی فیستیڤاڵەكەش یەك ملیار و (435) ملیۆن دینار بوە.

هەواڵ: (KNNC)

لە كۆنگرەیەكی رۆژنامەوانیدا، لیژنەی باڵای ئامادەكاری فیستیڤاڵی هەنار و پاییزی هەڵەبجە ئاماری سێ رۆژەكەی فیستڤاڵیان ئاشكرد و رایانگەیاند: بەهۆی باران بارینەوە كەمێك بەرنامەكانی فیستیڤاڵ گۆڕانكاری بەسەرداهات، بەڵام بەڵێن دەدەن كە بۆ فیستڤاڵی ساڵی ئایندە ئامادەكارییەكان باشتر دەكەن و سەرجەم كەموكورتیەكان چارەسەر دەكەن.

رونیانكردەوە؛ لەكاتی ئامادەكارییەكان بۆ فیستیڤاڵی هەڵەبجە دو هەزار ئارەزومەند ناوی خۆیان بۆ بەشداریكردن تۆماركردبو، لەكاتی تیرۆپشك كردن بۆ ناوەكان، (700) كەسیان بەشداری دەهەمین فیستیڤاڵی هەنار و پاییزی هەڵەبەجە كردوە كۆشكیان بۆ كراوەتەوە.

ئەوەیانخستەرو، لەو ژمارەیە (250) كۆشكیان بۆ هەنار و بەروبومە كشتوكاڵییەكان، (200) كۆشك بۆ بەهرەمەندان و كاری دەستی، (175) كۆشك بۆ خواردنە كوردییەكان و (75) كۆشكی دیكەش بۆ بەرهەمەكانی هەنگوین و بەروبومی وشكەی پاییزانە تەرخانكرابون.

لیژنەی ئامادەكاری فیستیڤاڵی هەنار و پاییزی هەڵەبجە ئاماژەیان بۆ ئەوەشكرد؛ ژمارەی گەشتیاران و سەردانیكارانی هەر سێ رۆژی فیستیڤاڵ (285) هەزار كەس بون كە رۆژی یەكەم (80) هەزار، دوەم رۆژ (110) هەزرا و رۆژی سێهەمیش نزیكەی (100) هەزار گەشتیار و سەردانیكار ئامادەی فیستیڤاڵەكەبون و كۆی گشتی داهاتی فیستیڤاڵەكە: یەك ملیار و 435 ملیۆن دینارە.


راشیانگەیاند: بەراورد بە ساڵی رابردو كە (270) هەزار گەشتیاران و سەردانیكاری فیستیڤاڵەكە بون ژمارەیان زیادی كردوە، هەروەك سوپاسی تەواوی دامودەزگا حكومییەكانی پارێزگای هەڵەبجەیان كرد كە پاڵپشتی تەواویان بۆ سەركەوتنی فیستیڤاڵەكە پێشكەشكردوە.