ئەندامێكی لیژنەی ئاسایش و بەرگریی ئەنجومەنی نوێنەران رایدەگەیەنێت: عێراق پابەندە بە خشتەی كۆتایی هێنان بەئەركی هێزەكانی هاوپەیمانان و كشانەوەیان.

هەواڵ: (KNNC)

عەلی بەنداوی، ئەندامی لیژنەی ئاسایش و بەرگریی لە ئەنجومەنی نوێنەرانی عێراق رایگەیاند: لەچوارچێوەی ئەو رێككەوتنەوەی كە لەگەڵ ویلایەتە یەكگرتوەكان بۆ كۆتایی هێنان بەئەركی هێزەكانی هاوپەیمانان لە عێراق كراوە، وڵاتەكەی پابەندە بە خشتەی كۆتایی هاتن و كشانەوەی هێزەكانی هاوپەیمانان.


وتیشی: پێشتر حکومەتی عێراق لەسەر ئەم بابەتە رێككەوتنی كردوە و کاتی بۆ کشانەوە بۆ هێزەكانی هاوپەیمانان بەسەرۆكایەتی ئەمەریكا داناوە، ئێستا پێویست دوبارە گفتوگۆكردنەوە ناكات.


ئەندامەكەی لیژنەی ئاسایش و بەرگریی ئەنجومەنی نوێنەرانی عێراق ئاماژەی بەوەشکرد: هێزە  ئەمنییەکانی وڵات بەرەوپێشچونی بەرچاویان بەخۆیانەوە بینیوە و گەیشتون بە ئاستێك كە دەتوانن ئەمنیەت و ئاسایشی شارەكان بپارێزن، هەروەها توانای روبەڕوی بونەوەی هەمو ئەو مەترسی و هێرشانەیان هەیە كە دەكرێنە سەر وڵات.


لە دو رۆژی رابردودا، رۆژنامەی واشنتۆن پۆستی ئەمەریكی لەزاری بەرپرسێكی كۆشكی سپی و فەرماندەیەكی سەربازی عێراقی ئاشكرایكردبو، لەدوای روخانی رژێمی بەشار ئەسەد لە سوریا و لەچوارچێوەی گۆڕانكارییەكانی رۆژهەڵاتی ناوەڕست، پێدەچێت حكومەتی عێراق داوای درێژكردنەوەی وادەی مانەوەی هێزەكانی هاوپەیمانان لە وڵاتەكەیدا بكات.