سەرچاوە سیاسییەکان ئاشکرایانکردوە؛ ئێران دەستى بە ناردنى هێز بۆ سوریا کردوە و ئیسرائیلیش نیگەرانیی خۆى دەردەبڕێت کە لەو ڕێیەوە ئێران هێزەکانى لە وڵاتەکە زیاد بکات.

هەواڵ:KNNC

رۆژنامەى هارتس-ى ئیسرائیلیى لە زارى سەرچاوەیەکى سیاسییەوە بڵاویکردوەتەوە؛ ئێران دەستى بە ناردنى هێزى سەربازیی کردوە بۆ سوریا، بۆ هاوکاریکردنى بەشار ئەسەد و روبەڕوبونەوەى هێرشى گروپە چەکدارەکانى هاوپەیمانى تورکیا.

رۆژنامەکە ئاماژەى بۆ ئەوەشکردوە کە ناردنى ئەم هێزە سەربازییانە لەلایەن ئێرانەوە بۆ باکورى سوریا بەمەبەستى پشتیوانییە لە حکومەتى سوریا و ئیسرائیلیش نیگەرانە ئێران هەلى ناجێگیریی ئاسایشى سوریا بقۆزێتەوە و هێزە سەربازییەکانى لە سوریا پەرە پێبدات و زیادیان بکات.

پێشتر ئێران دوپاتیکردوەتەوە کە بە هەمو جۆرێک پشتیوانى لە سوریا دەکات و ئەندامێکى لیژنەى ئاسایشى نیشتیمانیش لە پەرلەمانى ئێران رایگەیاند؛ دور نییە ئێران هێز بۆ سوریا بنێرێت، رونیکردەوە کە ئەم بڕیارە پەیوەست دەبێت بە بەرەوپێشچونە مەیدانییەکان و بڕیارى گەورە بەرپرسانى وڵاتەکە.