لەبارەی موچەی ساڵی (2025) ئەندامێكی ئەنجومەنی نوێنەرانی عێراق دڵنیایی دەدات و دەڵێت: پێشتر وەزارەتی دارایی ئامادەكاری كردوە هیچ نیگەرانییەک لەبارەی فایلی موچەوە نییە.


هەواڵ: (KNNC)


موزر مەعن، ئەندامی لیژنەی دارایی ئەنجومەنی نوێنەرانی عێراق رایدەگەیەنێت: سەرباری ناجێگری نرخی نەوت لە بازاڕەكانی جیهاندا، بەڵام لەڕوی ئابوریییەوە عێراق لە ئاستێكی باشدایە و توانیویەتی هاوسەنگی دارایی خۆی رێكیخاتەوە و بڕە پارەی یەدەگی پێویستیش بۆ دابەشكردنی موچە لە بانكی ناوەندی پارێزگار لێكراوە.


وتیشی: موچەی موچەخۆرانی عێراق بۆ تەواوی مانگەكانی ساڵی (2025) بیمەكراوە و هیچ هۆكارێكیش نییە بۆ نیگەران بون لەوبارەیەوە.


رونیكردەوە؛ ئەو دەنگۆیانەی باسی نەبونی پارە یان بێپارەیی رولەعێراق دەكات دورن لە راستییەوە و پێشتر وەزارەتی دارایی عێراق ئامادەكاری بۆ موچەی مانگەكانی ساڵی (2025) كردوە و هیچ گرفتێك بۆ دابەشكردنی موچە دروست نابێت.


ئەندامەكەی لیژنەی دارایی ئەنجومەنی نوێنەرانی عێراق ئاماژەی بەوەشکرد، پرۆسەی دابەشکردنی موچە و خەرجییە داراییەكانی دیكە لەڕێگای ڕێکارە سیستماتیکییەکان بەڕێوەدەچێت، بۆیە هیچ نیگەرانییەک لەبارەی فایلی موچەوە نییە.


لەچەند رۆژی رابردودا، ژمارەیەك لە شرۆڤەكارانی ئابوری سەرنجیان خستبویە سەر مەلەفی موچە لە عێراق و ئاماژەیان بۆ ئەوە كردبو، كە بەهۆی ناجێگیری نرخی نەوت لە جیهاندا پێدەچێت حكومەتی عێراق روبەڕوی قەیرانی دارایی ببێتەوە و گرفت بۆ دابەشكرنی موچەی موچەخۆران لە ساڵی (2025) دروست ببێت.