ژان نۆئێل بارۆ، وەزیری دەرەوەی فەرەنسا ڕایگەیاند، دەبێت هاوبەشە کوردەکانمان لە سوریا پارێزراوبن و هەڵگرتنی سزاکانی سەر سوریا و پێشکەشکردنی هاوکارییەکانی ئاوەدانکردنەوە بۆ وڵاتەکەش، پەیوەست بێت بە پابەندبونە سیاسی و ئەمنییەکان لە لایەن ئیدارەی نوێی دیمەشقەوە.

هەواڵ: KNNC

ئەمڕۆ چوارشەممە، ژان نۆئێل بارۆ وەزیری دەرەوەی فەرەنسا  لەبەردەم، پەرلەمانی وڵاتەکەیدا رایگەیاند پێویستە هاوبەشە کوردەکان لە باکوری ڕۆژهەڵاتی سوریا بپارێزرێن و مافەکانیان دەستەبەر بکرێت.

لەبەردەم پەرلەمانی وڵاتەکەیدا ئاماژەی بە ڕۆڵی کورد کردوە و رایگەیاندوە کە "کورد بەشێکی گرنگ و پێکهاتەیەکی سەرەکی بون لە شەڕی داعشدا"، دەبێت هێزەکانی سوریای دیموکرات بەشیكبن لە پرۆسەی سیاسی لە سوریای نوێدا

وەزیرەکەی فەرەنسا لەبارەی دۆخی سوریاوە راشیگەیاندوە، کە کۆبوونەوەیەک لەوباریەوە لەگەڵ هاوپەیمانە عەرەب، تورک و ڕۆژئاواییەکان لە مانگی یەکی ساڵی داهاتودا ڕێک دەخەن.

لەبارەی سزاکانەوە ئاماژەی بەوەشکردوە  هەڵگرتنی سزاکانی سەر سوریا  و هاوکارییەکان بۆ ئاوەدانکردنەوەی وڵاتەکە  پێویستە بە مەرج بێت و بەپێی پابەندییە سیاسی و ئەمنییەکانەوە بێت لە لایەن ئیدارەی نوێی دیمەشقەوە.