بەهۆی كەوتنەوەی ئاگر لە چیاكانی شاری لوس ئەنجلوسی ویلایەتی كالیفۆڕنیا پێنج كەس گیانیان لەدەستداوە چاوەڕێی بەرزبونەوەی ژمارەی قوربانیان دەكرێت، هاوكات سەرۆكی ئەمەریكاش دەڵێت؛ كارەسات روی لە وڵاتەكەیان كردوە.


هەواڵ: (KNNC)


ئەمڕۆ پێنجشەممە، میدیاكانی ئەمەریكا بڵاویانكردەوە، بەهۆی کەوتنەوەی ئاگر لە چیاكانی شاری لۆس ئەنجلۆس لە باشوری ویلایەتی کالیفۆرنیا، تا ئێستا پێنج كەس گیانیان لەدەستداوە و پێشبینی دەكرێت ژمارەی قوربانیان رولەزیادبون بكات.


ئاشكرایان كردوە، بەهۆی هەڵكردنی "با"ـی بەهێزە و بڵێسە كردنی زیاتری ئاگرەكە، تا ئێستا تیمەكانی بەرگری فریاگوزاری نەیانتوانیوە ئاگرەكە كۆنترۆڵ بكەن و زیانێكی گەورەی لەو ناوچەداوە.


بەوهۆیەوە، جۆ بایدن، سەرۆکی ویلایەتە یەكگرتوەكانی ئەمەریکا گەشتە چاوەڕوانكراوەكەی بۆ ئیتاڵیا هەڵوەشاندەوە و رایگەیاندوە، كارەساتێكی گەورە روی لە وڵاتەكەی كردوە كە بەهۆیەوە ناوچەیەكی بەرفراوان ئاگری لێكەوتوەتەوە و دەیان هەزار هاوڵاتی ناچاربون شوێنەكانیان بەجێبهێڵن.


میدیا ئەمەریكییەكان ئاماژەیان بۆ ئەوەشكردوە، نزیکەی ملیۆنێک ماڵ و شوێنی بازرگانی لەو پارێزگایە تەزوی كارەبا پچڕاوە، هاوكات تا كاتێكی نادیار دەرگای خوێندنگەكان داخراون.


لای خۆشیانەوە، پسپۆڕانی بواری ژینكە رایانگەیاندوە: بەهۆی گۆڕانی كەشوهەوار و بەرزبونەوەی پلەی گەرمی گۆی زەوی، هەروەها كەمبونەوەی رێژەی باران بارین، روداوەكانی ئاگر كەوتنەوە لەسەرتاسەری جیهاندا زیادیانكردوە و  پێدەچێت لە ساڵانی داهاتودا دۆخەكە بەرەو روداوی نەخوازراوتر هەنگاو بنێت.