لەبارەی ناوی دووبارە و زیادەی لیستی مووچە، غەریب ئەحمەد، ئەندامی ئەنجومەنی نوێنەرانی عێراق وەڵامی وەزارەتی دارایی و ئابوری حكومەتی هەرێمی كوردستان دەداتەوە و دەڵێت: هەڵەیەك لەلایەن بەندەوە وتراوە.

دوای تۆماركردنی بەرنامەكە غەریب ئەحمەد پەیوەندی بەبەشی پەیوەندییەكانی كەناڵەكەمانەوە كردوە و ڕای گەیاندوە ئەو ژمارەیەم بەهەڵە وتوە داوایكردوە بسڕێتەوە

ئەمەش دەقی رونكردنەوەكەیەتی:

وەڵام و ڕوونكردنەوەیەك بۆ وەزارەتی دارایی و ئابوریی هەرێم.

هەفتەی ڕابروو، لە نوسینگەی پەڕلەمانیم لەڕانیە کەناڵی KNN بەرنامەیەکیان لەگەڵ بەندە تۆمارکرد.

لەو بەرنامەیەدا لەبارەی ناوی دووبارە و زیادەی لیستی مووچە، هەڵەیەك لەلایەن گوتەی بەندەوە وترا لەبارەی ژمارەكان.

بەهۆی ئەوەی بەرنامەكە تۆماركراوبوو، كاتژمێر سێی پاشنیوەڕۆ كرا و بە بەندەشیان گوتبوو كاتژمێر 10:00ی شەو دادەبەزێت.

پاش بەرنامەکە، هەر زوو لەڕێگای پەیوەندییەوە ئاگاداری کەناڵەکەم کردەوە، کە ئەو ژمارەیە بە هەڵە لە قسەكانماندا ڕۆیشتووە و ئەو بەشەی دانەبەزێنن كەباسی ژمارە دەكات، بەڵام بۆ شەوەکەی بەرنامەکە پەخشکرا بەبێ ئەوەی ئەو ژمارە هەڵەیە لاببەن لەکاتێکدا بەڵێنیان دابوو لاببرێت!.

بۆیە، لێرەوە گلەیی و رەخنەمان ئاراستەی كەناڵی KNN دەكەین و وەزارەتی دارایی و ڕایگشتیش دڵنیا دەكەین، كە ئەو ژمارەیان بەبێ خواستی بەندە و بەهەڵە دابەزاندووە.

غەریب ئەحمەد
پەڕلەمانتاری عێڕاق
٢٠٢٥/١/٢٨