پسپۆڕانی خۆراك، پەڵپینەبە گەوهەرێکی بەنرخ پێناسە دەكەن، چونكە سەرباری تاموچێژەكەی سودی گەورە بە تەندروستی دەگەیەنێت، سەرۆکی سەنتەری خۆراک و تەندروستی ئاشكاریكردوە كە؛ روەكێكی موعجیزەییە و لەنێوان هەمو سەوزەكاندا بەرزترین ئاستی ترشە چەوری (ئۆمیگا - 3) تێدایە.

تەندروستی: (KNNC)

د. ئارتەمیس سیمۆپۆلۆس، سەرۆکی سەنتەری خۆراک و تەندروستی رایگەیاند: پەڵپینە روەکێکی خۆڕاگری بەهێزە و لە درزی شەقامەکانەوە سەوز دەبێت، روەکێکی موعجیزەییە، چونكە لەنێوان هەمو سەوزە جیاوازەكاندا بەرزترین ئاستی ترشە چەوی (ئۆمیگا - 3) تێدایە.

وتوشیەتی: گەڵاكانی پەڵپینە کە لە شێوەی دڵۆپی فرمێسکن، تاڕادەیەك تامی لیمۆی تازە دەدەن، روەكەكە دژە ئۆکسێنەر و ڤیتامین و کانزاکانی زۆری تێدایە، كە ئەمەش وایکردوە ببێتە خۆراكێكی بەهێز.

ئەمەریكییەكان تا سەرەتاكانی ساڵی (1900) پەڵپینەیان وەك یەكێك لە سەوزە سەرەكییەكان بۆ دروستكردنی ترشیات بەكاردەهێنا، بەڵام دواتر لەلایەن جوتیاران و ئامادەكارانی خواردەمەنییەوە گرنگی زیاتری پێدراوە و لە خواردەمەنییە جۆراوجۆرەكاندا بەكاریانهێناوە.

لە کاتی ئامادەکردنی پەڵپینە، زۆر گرنگە روەکەکە بەجوانی بشۆرێتەوە، چونكە تامەكەی كەمێك سوێرە دواتریش دەتوانرێت لەناو زەڵاتە و خواردنە جۆربەجۆرەكانا بەكاربهێنرێت.

سودەكانی پەڵپینە؛

بەهۆی هەبونی بەرزترین رێژە لە ترشە چەورییە ئۆمیگا-3 بەراورد بە سەوزەكانی دیكە، پەڵپینە سودێكی زۆر بۆ  تەندروستی مێشک و دڵ هەیە.

دژە ئۆکسێنەری (گلوتاتیون)ـی تێدایی بۆیە پەڵپینە یارمەتی پاراستنی خانەکان دەدات و دەركەوتنی پیربون لەسەر پێست دوادەخات.

کانزاکان، پەڵپینە بڕێکی زۆر لە کالیسیۆم، مەگنیسیۆم، پۆتاسیۆم، ئاسن، فسفۆر، مەنگەنیز، مس، فۆلات و سیلینیۆمی تێدایە بۆیە پەڵپینە تەواوكاری خۆراكی پڕدەكاتەوە و تەندروستی دەپارێزێت.

ڤیتامین (C):  پەڵپینە بە سەرچاوەیەکی زۆری ئەم ڤیتامینە دادەنرێت كە هاوكاری بەرز بونەوەی بەرگری لەش دەكات.

بێتا کارۆتین: كە وەک پێشەکییەک بۆ ئامادەكردنی ڤیتامین (A) لەلەشدا کاردەکات، چارەسەری ئەو کەمیی ئەو ڤیتامینە دەکات کە بە شێوەیەکی باو لە کەسەکاندا دەبینرێت.

میلاتۆنین: پەڵپینە هۆرمۆنی میلاتۆنینی تێدایە کە زۆر گرنگە بۆ رێکخستنی شێوازی خەوتن، كە بەیەكێك لە سەرچاوە سروشتی بەنرخەكان بۆ بەدەستهێنانی ئەو هۆرمۆنە دادەنریت.

کەمکردنەوەی کۆلیسترۆڵ: بەهۆی دژە ئۆكسێنەری (بیتالین) کە لە پەڵپینەدا هەیە، یارمەتیدەرە بۆ ڕێگریکردن لە تێکچونی کۆلیسترۆڵ بۆ خوێنبەرەکان و کاریگەری لەسەر ئاستی کۆلیسترۆڵی (LDL) هەیە.

تریپتۆفان: پەڵپینە (پورسلاین تریپتۆفان)ـی تێدایە كە ترشێکی ئەمینییە و هاوكاری بۆ رێکخستنەوەی باری دەرونی و بەرەنگاربونەوەی خەمۆکی.