لە سێ روداوی ناوچە جیاوازەكانی هەرێمدا شەڕكردن رویداوە و بەهۆشیەوە ژمارەیەك كەس گیانیان لەدەستداوە و ژمارەیەكی دیكەش برینداربون.


هەواڵ: (KNNC)


پەیامنێری کەی ئێن ئێن ڕایگەیاند، ئێوارەی ئەمڕۆ لە گوندی قاسم بەگزادە لە ناحیەی شۆڕش سەر بە قەزای چەمچەماڵ شەڕ و ئاڵۆزی لە نێوان دو بنەماڵەدا رویداوە و بەهۆیەوە سێ کەس کوژراون و کەسێکی دیکەش بەسەختی برینداربوە.


وتیشی: شەڕەکە لەسەر کێشەی زەوی و زار بوەو دو بنەماڵەکە ئامۆزا و خزمی یەکترن، دوان لە کوژراوەکان برای یەکترن و ئەوی دیکەش ئامۆزایانە.


هاوكات، چەند خولەکێك پێش بانگی ئێوارە لە ناوبازاری شاری دهۆک شەر لەنێوان چەند دوكاندارێك رویداوە و ژمارەیەك كەس برینداربون، بەپێ زانیاریەکان هۆکاری شەڕەکە بۆ كاروبازرگانی نێوان دو دوكاندار دەگەڕێتەوە، دواتر لەلایەن پۆلیسی دهۆکەوە كۆتایی بەشەڕكردنەكە دەهێنرێت.


پەیامنێری كەی ئێن ئێن ئاماژەی بۆ ئەوەشكرد، لە روداوێكی دیكەدا و بەهۆی كێشەی كۆمەڵایەتییەوە  شەڕكردنی نێوان دو بنەماڵەدا لە گوندێ گومەزەرد لە قەزا بەردەرەش رویداوە و بەهۆیەوە پێنج كەس برینداربون، كە دو كەسیان بەهۆی گولـلەوە بوە، بۆ وەرگرتنی چارەسەری پێویستیش بریندارەكان ئەوانەی نەخۆشخانە كراون.