ئەنجومەنی ئاسایشی نێودەوڵەتی بۆ تاوتوێکردنی دۆخی سوریا کۆبوەوە، نوێنەری نەتەوە یەکگرتوەکانیش بۆ کاروباری سوریا دەڵێت: لە کەناراوەکانی ئەو وڵاتە کۆمەڵکوژی کراوە و دەبێت لێکۆڵینەوە بکرێت.

هەواڵ:KNNC

گەیر پیدەرسن، نوێنەری نەتەوە یەکگرتوەکان بۆ کاروباری سوریا، رایگەیاند: لە ڕوداوەکانی ئەم دواییەی سوریادا هێرشی چەکداری ڕویداوە و خەڵکێکی زۆر کۆمەڵکوژکراون، کە ئەمەش بوەتە کێشەیەکی ئەمنی لە وڵاتەکە و نیگەرانییەکانی لە داهاتوی وڵاتەکە زیاتر کردوە.

باسی لەوەش کرد، بە پشتبەستن بە زانیارییەکان دەرکەوتوە، خەڵکی مەدەنی لەلایەن چەکدارەکانی ڕژێمی پێشو و حکومەتی نوێی سوریا کوژراون، کە ئەمەش جێگەی نیگەرانییە.

 جەختی لەوەش کردەوە، دەبێت لێژنەیەکی سەربەخۆ پێکبهێنرێت و ئەندامی هەموو لایەنەکانی تێدا بێت، بۆ ئەوەی بە بەڵگە لە ماوەی 30 ڕۆژدا هەموو ڕاستییەکان ئاشکرا بکرێن.

نوێنەرەکەی نەتەوە یەکگرتوەکان لەبارەی ڕێکەوتنەکەی نێوان مەزڵوم عەبدی و ئەحمەد شەرعەوە ڕایگەیاند، بەرەوپێشچونی باش لە گفتوگۆکانیاندا هەیە و دەبێت تا کۆتایی ئەمساڵ ڕێکەوتنەکە بچێتە بواری جێبەجێکردنەوە.