بە پاڵپشتی هاوپەیمانی نێودەوڵەتی و لە ئۆپەراسیۆنێكی سەربازیدا لە پارێزگای حەسەكە، هەسەدە ئەندامێکی چالاکی رێكخراوی داعشیان دەستگیركرد.

هەواڵ: (KNNC)


ناوەندی راگەیاندنی هێزەكانی سوریای دیموكرات (هەسەدە) بڵاویكردەوە؛ تیمەکانی ئۆپەراسیۆنە سەربازییەکانی هەسەدە بەپاڵپشتی هێزەکانی هاوپەیمانی نێودەوڵەتی ئۆپەراسیۆنێکی ئەمنییان لەحەسەكە ئەنجامداوە و توانیوانە ئەندامێکی چالاکی داعش  بەناوی (زاهیر کەیدی فیان) دەستگیربكەن كە كاری سەرەكی بەقاچاغبردنی ئەندامە تیرۆریستییەکان بە گشتی و بەتایبەتی ژنانی داعشی بیانی بوە لە كەمپی هۆل.


ئەوەیخستوەتەڕو، ئۆپەراسیۆنەکە لە گوندی توەیمینی سەر بەشەداد لە باشوری  رۆژهەڵاتی حەسەکە ئەنجامدراوە، كە ئەندامێكی رێکخراوی تیرۆرستی داعشی تیایدا كرایە ئامانج و دەستگیركرا.


رونیكردوەتەوە، پێشتر هەسەدە زانیاری تەواوی لەسەر جموجۆڵ و چالاکییەکانی تیرۆرستەكە كۆكردوەتەوە و كە نازناوی (ئەبو غازی)ـی بەكارهێناوە، هەروەها لەمیانەی ئۆپەڕاسیۆنەكەدا دەستیان بەسەر ژمارەیەک چەک و تەقەمەنی و کەرەستەی سەربازیدا جۆراوجۆردا گرتوە.


ناوەندی راگەیاندنی هێزەكانی سوریای دیموكرات (هەسەدە) ئاماژەی بۆ ئەوەشكردوە، بۆ پاراستنی ئاسایش و سەقامگیری ناوچەکە هێزەکانیان جەخت دەكەنەوە؛ بەردەوام دەبن لە ئۆپەراسیۆنە ئەمنی و سەربازییەکانیان دژی تیرۆرستان تا كۆتاییان پێدەهێنن.