قائیمقامییەتی سلێمانی رایگەیاند، لە ئەنجامی سەردان و بەدواداچونی لیژنەکانیان بۆ چێشتخانە و رێستۆرانت و ئەو شوێنانەی گەشتیارانی روی تێدەکەن، بۆیان دەرکەوتوە سلیمانی یەکێکە لە خاوێنترین شارەکانی عێراق.

هەواڵ:KNNC

ئازاد نەبی، نوێنەری بەڕێوەبەرایەتی گشتی تەندروستی لە لیژنە هاوبەشەکانی قائیمقامیەتی سلێمانی رایگەیاند: لەدرێژەی سەردان و بەدواداچونەکانی لیژنەکان لەمانگی رەمەزانی پیرۆز و رۆژانی جەژن بۆ چێشتخانە و ریستۆرانت و هەمو ئەوشوێنانەی گەشتیاران و میوانەکانی شاری سلێمانی روی تێدەکەن، پابەندی سەرجەم مەرجەکانی کارکردنن و لە شوێنەکانیان سەرپێچییەک تۆمارنەکراوە پەیوەندی بەرێنماییەکانی تەندروستییەوە هەبێت.

وتیشی: لیژنە هاوبەشەکان دەستخۆشی لە سەرجەم ئەو شوێنانە دەکات و هیوادارن کە هەمیشە پابەندی مەرجەکانی تەندروستی و ڤێتێرنەری و رێنماییەکانی دیکەی کارکردن بن، کە بەهاوکاری ئەوان ئێستا سلێمانی خاوێنترین شاری عێراق و هەرێمە.

نوێنەرەکەی تەندروستی لە لیژنەکانی قائیمقامیەتی سلێمانی جەختیکردەوە، ئامانجی سەرەکی پێکهێنانی لیژنەکان پابەندکردنی شوێنەکانە بەمەرج و رێنماییەکان نەک سزادان و زیان گەیاندن بەکار و  بازاڕی هیچ شوێنێک.