زەبیحوڵڵا موجاهید وتەبێژی تاڵیبان لە چاوپێکەوتنێکی تەلەڤیزۆنیدا  ڕایگەیاندوە؛ هیچ دوژمنایەتییەک هەمیشەیی نییە،  دوژمنایەتی ئێستایان لەگەڵ ئەمەریکا دەکرێت بگۆردرێت بۆ دۆستایەتی، دوپاتیشی کردوەتەوە دوای ڕێککەوتنی دۆحە، دۆخی تاڵیبان گۆڕاوە و چیتر لەگەڵ هیچ وڵاتێکدا لە شەڕدا نین.

هەواڵ:KNNC

لەدوای گفتوگۆی نێوانیان و ئازادکردنی هاوڵاتییەکەی ئەمەریکی لەبەرامبەردا سرینەوەی ناوی چەند بەرپرسێکی تاڵیبان کە داواکراو بون لەلایەن ئەمەریکاوە،  پەیوەندی نێوان ئەمەریکا و تاڵیبان ڕو لە ئاسای بونەوەیە.

وتەبێژی تاڵیبان لە نوێترین چاوپێکەوتنیدا لەگەڵ تۆڕی هەواڵی ئەلعەرەبیە ڕایگەیاندوە؛ دوژمنداریان لەگەڵ هیچ وڵاتێکدا نییە و  هەوڵدەدەن پەیوەندی ئابوری و سیاسی هاوسەنگیان هەبێت لەگەڵ هەمو وڵاتان بە ئەمەریکاشەوە.

موجاهید ئاماژەی بەوەشکردوە "پەیوەندییەکی باشیان" لەگەڵ وڵاتانی دراوسێی ئەفغانستان هەیە، بەتایبەتی وڵاتانی ئیسلامی، هەروەها لە بەشێک لەو وڵاتانە ژمارەیەک باڵیۆزخانەمان هەیە و ئەوانیش باڵوێزیان لە وڵاتەکەی ئێمەدا هەیە.


لەباری بون بە دەوڵەتەوە، وتەبێژەکەی تاڵیبان وتویەتی؛ راستە تا ئێستا بە فەرمی حکومەتەکەمان  دانیپێدانەنراوە، بەڵام لە میدیاکان، بە کردەوە و لە واقیعدا ئێمە دەوڵەتێکی فەڕمین.


زەبیحوڵڵا ئاماژەی بەوەشکردوە، وەک تاڵیبان دەیانەوێت "پەیوەندی فەرمیان" لەگەڵ ئەمەریکا هەبێت و ئەوەش لە بەرژەوەندی هەر دولادایە، بۆ ئەو مەبەستەش هیچ مەرجێکیان دانەناوە و لە گفتوگۆدان لە گەڵ ئەمەریکا بۆ ئەوەی باڵوێزخانەی خۆیان لە واشنتۆندا بکەنەوە.

تا ئێستا و دوای سێ ساڵ لە گەڕانەوەی تاڵیبان بۆ سەر دەسەڵات لە ئەفغانستان، هیچ وڵاتێکی جیهان دانیان بە حکومەتەکەیاندا نەناوە، لە کۆڕ و کۆڕبەندە نێودەوڵەتییەکاندا هەمیشە دەسەڵاتەکەیان بە "پێشێلکاری مافی مرۆڤ" تۆمەتبار دەکرێت.

پێکهێنانی حکومەتێکی گشتگیر و پچڕانی پەیوەندی لەگەڵ تاقمە تیرۆریستییەکان و بەرەنگاربونەوەی ئەو گروپانە، ڕەچاوکردنی مافەکانی مرۆڤ و لابردنی کۆتوبەندی ئازادییەکانی سەر ژنان بە ڕواڵەت لە داواکارییە نێودەوڵەتییەکانن بۆ ئەوەی دان بە حکومەتەکەی تاڵیباندا بنرێت.