هێزەکانی سوریای دیموکرات (هەسەدە) و هێزەکانی سەر بە حکومەتی کاتی سوریا دەستیان کرد بە پڕۆسەی ئاڵوگۆڕکردنی زیاتر لە 200 بەندکراو وەک بەشێک لە رێککەوتنێکی ئەم دواییەی نێوان هەردولا.

هەواڵ:KNNC

ئەمڕۆ پێنجشەممە دەستکرا بەجێبەجێکردنی رێککەوتنی نێوان هەسەدە و هێزەکانی سەر بە دیمەشق، سەبارەت بەئازادکردنی  زیاتر لە 200دیل کە 150یان شەڕڤانی هەسەدەن و ئەوانیتریش چەکداری سەر بە حکومەتى دیمەشقن.

لەلای خۆیەوە روانگەی سوری بۆ مافەکانی مرۆڤ رایگەیاندوە،  زیاتر لە 200 دەستگیرکراو لە نێوان هەسەدە و حکومەتی کاتی دیمشق ئاڵوگۆڕ دەکرێن، ئەمەش دوای ڕێککەوتنی نێوانیان کە ڕۆژی سێشەممە واژوی لەسەرکراوە.

لە ڕاگەیەندراوەکەشدا ئەوە هاتوە؛  هێزەکانی سوریای دیموکرات (هەسەدە) 40 تەرمی شەڕڤانانی خۆی لە هێزەکانی سوریا وەردەگرێتەوە، بەرامبەر بە ئازادکردنی 25 دیل کە لەنێوانیاندا چواریان تورکن.

هەسەدە و حکومەتی کاتی دیمەشق, رۆژی سێشەممە  لەنێوانیاندا رێککەوتنێکیان واژۆ کرد بۆ ئاڵوگۆڕکردنی هەمو بەندکراوان و هێشتنەوەی هێزەکانی ئاسایشی ناوخۆ کە سەر بە هەسەدەن لە گەڕەکەکانی ئەشرەفیە و شێخ مەقسودی حەلەب کە زۆرینەیان کوردن.

پێشتر رواگەی سوری ئەوەی خستبە ڕو؛  هێزەکانی سوریای دیموکرات و سوپای سوریا، دیل و تەرمەکانی ئەو چەکدارانەی لە چەند هەفتەی رابردودا، لە بەرەی بەنداوی تشرین و پردی قەرە قۆزاک لە لادێکانی رۆژهەڵاتی حەلەب کوژراون ئالوگۆڕ دەکەن.

ئەمە لەکاتێكدایە  مانگی کانونی یەکەمی 2024ـ، نزیکەی 800 کەس لە هێزەکانی دیمەشق و هێزەکانی سوریای دیموکرات لە گەڕەکەکانى شێخ مەقسوود و ئەشرەفیە دەستگیرکراون و لە ئێستادا هەردولا گەیشتوونەتە رێککەوتن بۆ ئاڵوگۆڕپێکردنیان.