هاوپەیمانی دەوڵەتی یاسا هەوڵی جدی دەدات لە پەرلەمانی عێراق بۆ ئەوەی هەمواری یاسای هەڵبژاردن بکات بە مەبەستی بەڕێوەچونی هەڵبژاردن بە شێوەیەکی دیموکراسی، پەرلەمانتارێکی عێراقیش دەڵێت: ئەو هەموارەی پێشنیارکراوە بەرپرسانی دەوڵەت لە پرۆسەی هەڵبژاردن دوردەخاتەوە.

هەواڵ:KNNC

هاوپەیمانی دەوڵەتی یاسا، بە سەرکردایەتی عارف حمامی، پەرلەمانتاری عێراق، بە هەماهەنگی لەگەڵ بەشێکی دیکەی پەرلەمانتارانی لایەنە جیاوازەکان، هەوڵێکی جدی دەدەن بۆ ئەوەی هەمواری یاسای هەڵبژاردن بکەن.

عارف حمامی لە لێدوانێکیدا باسی لەوەکردوە، ئەو هەموارەی پێشنیارکراوە، ڕێگرە لەوەی پێگەی سیاسی یاخود پارە و دەسەڵات لەلایەن بەرپرسانی ناو حکومەت بۆ پڕوپاگەندەی هەڵبژاردنەکان بەکاربێت و هێزە ئەمنییەکان و بەرپرسانی دەوڵەت لە پرۆسەی هەڵبژاردن دور دەخاتەوە.

جەختیشی کردەوە لەوەی لایەنگرانی هەوڵەکانیان بۆ هەموارەکە لە چەند مانگی داهاتو زیاتر دەبێت و ئامانجیان دڵنیابونە لەوەی کە بەرپرسان کاریگەرییان لەسەر پرۆسەی دیموکراسی نییە.