وەزارەتی نەوتی عێراق راگەیەنراوێکی لەبارەی هەناردەکردنەوەی نەوتی هەرێمی کوردستان بڵاوکردەوە، راگەیەنراوەکەی ئەپیکور رەتدەکاتەوە و دەڵێت: کارمان کردوە و هەوڵدەدەین لە نزیکترین کاتدا و بەپێی یاسای بودجە هەناردەی نەوتی هەرێمی کوردستان دەستپێبکەینەوە.

هەواڵ:KNNC

لە راگەیەنراوەکەی وەزارەتی نەوتی عێراقدا هاتوە، هەر جارێک دانوستانەکانی پەیوەست بە هەناردەکردنەوەی نەوتی هەرێمی کوردستان بەرەوپێش دەچن، بەهۆی داواکاری ناڕاستەقینەوە ئاڵۆزی نوێ سەرهەڵدەدەن.

دەشڵێت: کاردەکەن بۆ دڵنیابونەوە لە جێبەجێکردنی دروستی یاسای هەمواری بودجە کە لە دووی شوباتی ئەمساڵ پەسەندکراوە، بۆئەوەی هەناردەکردنەوەی نەوتی هەرێمی کوردستان لەرێگەی بەندەری جەیهانی تورکیاوە دەستپێبکاتەوە، بۆئەوەش حکومەتی عێراق هەنگاوی جدی ناوە بۆ نیشاندانی نیەتپاکی خۆی لە دانوستانەکان.

بەگوێرەی راگەیەنراوەکە، داواکاریی ناواقیعی و دەرەوەى چوارچێوە یاساییەکان، گەیشتن بە رێککەوتن پەکدەخات.

دەشڵێت، گەیشتن بە رێککەوتن رێگری لە فرۆشتنی نایاسایی نەوت دەکات.

وەزارەتی نەوتی عێراق، داوای کۆبونەوەیەکی بەپەلە دەکات لەگەڵ لایەنە پەیوەندیدارەکان بۆ دەستپێکردنەوەی دانوستانەکان، بەمەرجێک بەپێی هەمواری یاسایی بودجە بێت و بگەنە میکانزمێکی کارکردنی رون کە مافەکانی عێراق بپارێزێت و پابەندبونەکانی بەرامبەر وەبەرهێنەران گرەنتی بکات.

راگەیەنراوەکەی وەزارەتی نەوتی عێراق لەکاتێکدایە،  کۆمەڵەی پیشەسازیی نەوتی کوردستان ''ئەپیکور'' رایگەیاندبو، بەهۆی ڕاگرتنی هەناردەی نەوتی هەرێمی کوردستان زیانێکی زۆریان بەرکەوتوە، نەوتیان بە نیوەی نرخی بازاڕی جیهان فرۆشتوە و کۆمپانیا ئەندامەکان بە بڕی 400 ملیۆن دۆلار وەبەرهێنانیان ڕاگرتوە.