راوێژکارێكی سەرۆک وەزیرانی عێراق ئاشكرایدەكات؛ سەپاندنی باج لەلایەن سەرۆكی ئەمەریكاوە بۆ بەرهەمە هەناردەكراوەكانی وڵاتان، هەناردەی وزە و نەوتی خاوی عێراق ناگرێتەوە و بڕیارەكە کاریگەری ئابوری لەسەر بەغداد زۆر سنوردارە.

هەواڵ: (KNNC)

ئەمڕۆ پێنجشەممە، فەرهاد عەلادین، راوێژکاری سەرۆک وەزیرانی عێراق بۆ پەیوەندییەکانی دەرەوە، رایگەیاند: بڕیاری سەپاندنی باج و زیادكردنی رەسمە گومرگییەكان لەسەر بەرهەمە هەناردەكراوەكانی وڵاتان بۆ ئەمەریكا، لەلایەن ترەمپەوە هەناردەی وزە بە نەوتی خاویشەوە، ناگرێتەوە.

وتیشی: لە ئێستادا عێراق مانگانە لە نێوان شەش بۆ حەوت ملیۆن بەرمیل نەوتی خاو و وەرگیراوەکانی دیكە هەناردەی ئەمەریکا دەکات، ئەم هەناردەکردنەش بڕبڕەی پشتی هەناردەکردنی عێراق پێکدەهێنن و کاریگەرییان لەسەر رێوشوێنە گومرگییەکانی ئەم دواییە نابێت.

رونیكردەوە، سەبارەت بە بەرهەمە هەناردە كراوەكانی دیكەی عێراق بۆ ئەمەریكا لە روی قەبارەوە سنوردارە بۆیە بڕیارەكەی دۆناڵد ترەمپ بۆ سەپاندنی باج بەڕێژەی (39%) کاریگەریی ئابوریی لەسەر عێراق لە رادەبەدەر سنوردار دەبێت.

راوێژکارەكەی سەرۆک وەزیرانی عێراق ئاماژەی بۆ ئەوەشكرد كە، هاوبەشی ستراتیژی نێوان عێراق و ویلایەتە یەكگرتوەكانی ئەمەریکا بەبەهێز ماوەتەوە، هەروەها گرتنەبەری ئەو رێوشوێنانە کاریگەری لەسەر کرۆکی پەیوەندی ئابوری یان دیپلۆماسی نێوان هەردو  وڵات نابێت، هەروەها بەغداد بەردەوامە لە پابەندبوونی خۆی بە قووڵکردنەوەی هاوکاری لەگەڵ واشنتۆن لە کەرتە جیاوازەکاندا، بەتایبەتی لە بوارەکانی وزە و وەبەرهێنان و بەرزکردنەوەی سەقامگیری لە ناوچەکەدا.