لەبۆردومانێكی ئیسرائیل بۆ سەر خوێندگەیەك لە غەززە نزیکەى 100 كەس كوژران و سوپای ئیسرائیلیش دەڵێت: بنكەی سەربازیی حەماس لەناو خوێندگەکەدا بوە، بۆیە بۆردومانیان کردوە.

هەواڵ:KNNC

بەرگریی شارستانیی غەززە بڵاویكردەوە: ئیسرائیل سێ موشەكی ئاراستەی خوێندنگەی تابعین كردوە، لە ناوەڕاستی غەززە كە ئاوارەكانی تێدا بوە و بەهۆیەوە نزیکەی 100 كەس كوژراون و دەیان كەسی تریش برینداربون و تیمەكانیان سەرقاڵی دەرهێنانەوەی تەرمی قوربانییان و ڕزگاركردنی بریندارەكانن.

لای خۆیشییەوە، سوپای ئیسرائیل بڵاویكردەوە: لەسەر زانیاریی هەواڵگری، فڕۆكە جەنگییەكان بۆردومانی بارەگایەكی سەركردایەتی سەربازیی حەماسیان لەناو خوێندنگەی تابعین لە غەززە دروستكردوە، ئەو بنكەیە بەكارهێنراوە بۆ خۆشاردنەوە و پلاندانان بۆ هێرشكردنەسەر سوپا و دەوڵەتی ئیسرائیل.

بەپێی ئامارەکانى وەزارەتى تەندروستیی فەڵەستین، تا ئێستا 39 هەزار و 699 هاوڵاتی بەهۆی هێرشەکانى ئیسرائیلەوە کوژراون و 91 هەزار و 398 کەسی تریش برینداربون.