کۆمپانیای مێتا، بەنیازە سێ هەزار و 600 کارمەند لە کارەکانیان دوربخاتەوە و کەسانی نوێ بۆ پڕکردنەوەی پۆستەکانیان دابمەزرێنێت.

هەواڵ:KNNC

پێگەی بلومبێرگ بڵاویکردوەتەوە، کۆمپانیای مێتا کە خاوەندارییەکانی تۆڕە کۆمەڵایەتییەکانی (فەیسبوک، واتسئەپ، ئینستاگرام) دەکات، بەنیازە 5%ـی کارمەندەکانی کە دەکاتە سێ هەزار و 600 کارمەند کە لە "لاوازترین" کارمەندەکانن، لەکارەکانیان دوربخاتەوە و کەسانی نوێ بۆ پڕکردنەوەی پۆستەکانیان دابمەزرێنێت.

لە ئێستادا کۆمپانیای مێتا، نزیکەی 72 هەزار کەسی دامەزراندوە وەک ئامادەکارییەک بۆ دورخستنەوەی سێ هەزار و 600 کارمەند.

مارک زوکەربێرگ، خاوەنی کۆمپانیاکە ئاماژەی بەوەکردوە، ئەمجارە دەیانەوێت دڵنیابن لەوەی ئەو کەسانەی بۆ کار وەریدەگرن بەهرەمەندن و ئەدای کارکردنیان باشە.

ئەو هەنگاوەی مێتا، بەشێکە لە زنجیرەیەک ڕێوشوێنی پەیوست بە تۆڕە کۆمەڵایەتییەکان لە سەردەمی سەرۆکایەتی دۆناڵد ترەمپ و ئیلۆن مەسک.

مێتا لە سەردەمی بڵاوبونەوەی ڤایرۆسی کۆرۆنا، گەشەیەکی بەرفراوانی بەخۆیەوە بینی، بەڵام دواتر نزیکەی 20 هەزار هەلی کاری کەمکردەوە، لەساڵی 2023ـدا زوکەربێرگ "ساڵێکی کارایی" بۆ کۆمپانیاکە راگەیاند و دوای ئەو کەمکردنەوەیە قازانجی کۆمپانیاکە زیادی کرد.