پێش گەشتەکەى بۆ رۆژهەڵاتى ناوەڕاست، وەزیرى دەرەوەى ئەمەریکا لەڕێی پەیوەندیی تەلەفۆنییەوە هۆشداریدایە سودانى بۆ پاراستنى هێزەکانیان لە هەر هێرشێک.

هەواڵ:KNNC

بەپێێ راگەیەنراوێکى وەزارەتى دەرەوەى ئەمەریکا هەریەکە لە محەمەد شیاع سودانى و ئەنتۆنى بلینکن، وەزیرى دەرەوەى ئەمەریکا لەڕێی پەیوەندیی تەلەفۆنییەوە گفتوگۆیەکیان ئەنجامدا و لەو پەیوەندییەدا بەدیهێنانى ئارامى  و سەقامگیریی لە ناوچەکە و گرنگیی رێگریکردن لە زیادبونى گرژییەکان تاوتوێ کراون.

ئاماژە بۆ ئەوەکراوە کە ئەنتۆنى بلینکن هۆشداریداوەتە سودانى بۆ پاراستنى راوێژکارانى هاوپەیمانان و هێزەکانیان لە هەر هێرشێک و جەختى لە پاراستنیان کردوەتەوە.

لە بەشێکى دیکەى گفتوگۆکانیاندا، سودانى و بلینکن باسیان لە پەیوەندییەکانى نێوان هەردو وڵات و راوێژکاریی نێوان هەردولا کراوە و جەخت لە برەودان بە پەیوەندییەکانیان کراوە.

بڕیارە ئەمڕۆ، وەزیرى دەرەوەى ئەمەریکا لەنێوەندى گرژییەکاندا بە سەردانێک بگاتە رۆژهەڵاتى ناوەڕاست و سەردانى هەریەکە لە قەتەر و میسر و ئیسرائیل بکات.