تۆمەتبارانی روداوەكەی بێجی كە تیایدا خێزانێك دوای ئەشكەنجەدان، كوشتنیان و سوتاندویانن، دەسگیركران كە یەكێك لە تۆمەتبارەكان كەسێكی نزیكیانە.

هەواڵ: (KNNC)

عادل عەلی، قائیمقامی قەزای بێجی رایگەیاند: ئەو تۆمەتبارانەی سەفا حەمید و خێزانەكەیان بۆ دزیلێكرن كوشتوە، دەستگیركراون، پاش لێكۆڵینەوە لەگەڵیاندا دانیان بەتاوانەكەیانداناوە.

رونیكردەوە، تۆمەتبارەكان بۆ دزیكردن چونەتە سەر ماڵەكە و پاش ئەوەی ئەشكەنجەیان داون دواتر كوشتونیان و پاشان تەرمەكانیشان سوتاندوە، كە یەكێك لە تۆمەتبارەكان كەسێكی نزیك خاوەن ماڵەكەیە لەگەڵی كاردەكات.

قائیمقامی قەزای بێجی ئاماژەی بۆ ئەوەشكرد، دوای بەدواداچون و لێكۆڵینەوە لە روداوەكە و دەستكەوتنی زانیاری لەسەریان، هێزە ئەمنییەكانی پارێزگای سەڵاحەدین توانیان تۆمەتبارەكان لە نزیك قەزی بەلەد دەستگیر بكەن و روبەڕوی دادگایان دەكەنەوە.

پێشتریش قائیمقامی بێجی رایگەیاندبو، روداوی كوشتن و سوتاندنی سەفا حەمید و مستەفای كوڕی و خێزاكەی، كردەوەی تیرۆریستی نییە، بەڵكو ئەنجامدانی تاوانە و چەند كەسێك بۆ دزیكردن ئەو تاوانەیان ئەنجامداوە.