لە ئۆپەراسیۆنێکی هاوبەشی هێزەکانی ئەمەریکا و عێراق لە پارێزگای ئەنبار، 15 چەکداری داعش کوژران و حەوت سەربازی ئەمریکاش بریندار بون.

هەواڵ:KNNC

فەرماندەیی ناوەندیی ئەمەریکا ناسراو بە سێنتکۆم، بەیاننامەیەکی لەبارەی ئۆپەراسیۆنێکیان لە رۆژئاوای عێراق بڵاوکردوەتەوە کە رۆژى پێنجشەممە ئەجامیانداوە و تێیدا دەڵێت: لەگەڵ هێزە ئەمنییەکانی عێراق، ئۆپەراسیۆنێکی هاوبەشیان لە رۆژئاوای عێراق لە دژی داعش ئەنجام داوە و تیایدا 15 چەکداری داعشیان کوشتوە.

هەر لەوبارەیەوە، فەرماندەیەکی وەزارەتی بەرگریی ئەمەریکا ئاشکرایکردوە، کە لەو ئۆپەراسیۆنە هاوبەشەدا حەوت ئەندامی هێزەکانیان بریندار بون.

سێنتکۆم لە راگەیەنراوەکەیدا ئاماژەی بەوەش کردوە، هێشتا داعش هەڕەشە و مەترسییە بۆ سەر ئاسایشی ناوچەکە و هاوپەیمانەکانیان، هەربۆیە بەردەوام دەبن لە شەڕی دژ بە داعش و گروپە تیرۆرستییەکانی تر.