ئەو کۆچبەرە کوردانەى لە ئاوەکانی نزیک ئیتاڵیا گیریان خواردبو، بە سەلامەتی رزگار کران و گوازرانەوە بۆ یۆنان.

هەواڵ:KNNC

شەوی رابردو، زیاتر لە 60 کۆچبەری کوردی باشور و رۆژهەڵاتى کوردستان و ئێران، لە ئاوەکانی نێوان وڵاتی ئیتاڵیا و یۆنان، لە گرتەیەکی ڤیدیۆییدا داوای بەهاناوەچونیان کرد، کە بە وتەی خۆیان، کەشتییەکەیان کون بوە و مەترسی لەسەر ژیانیان هەیە.

سەرلەبەیانی ئەمڕۆ، رەنج پشدەری چالاکوانی بواری کۆچبەران رایگەیاند، ئەو کۆچبەرانە کە ژمارەیان نزیکەی 60 کەس بوە، رزگار کراون و بەسەلامەتی بە کەشتییەک گواستراونەتەوە بۆ ناو خاکی یۆنان.

بەگوێرەی ئەو گرتە ڤیدیۆییەی کە کۆچبەرەکان قسەی تێدا دەکەن، خەڵکی شارەکانی هەولێر و سلێمانی و چەند شارێکی رۆژهەڵاتی کوردستان و ئێران بون و بەشێکیان ژن و منداڵ بون..