دوای وەرگرتنی چارەسەری پێویست و راهێنانی وەرزشی (2000) ئالودەبو ماددە هۆشبەرەكانیان تەرككردوە و بەسەركەوتویی قۆناغەكەیان تێپەراند هەروەها بەتەندروستییەكی باشەوە گەڕێنرانەوە ناوكەسوكاریان.

هەواڵ: (KNNC)

حسێن یوسف، بەڕێوەبەری راگەیاندنی بەڕێوەبەرایەتی کاروباری ماددە هۆشبەرەکان بڵاویكردوەتەوە؛ دوای ئەوەی لەلایەن پزیشكی تایبەتی دەرونی و ئەنجامدانی راهینانی هۆشیاری، وەرگرتنی چارەسەری پێویستی تەندروستی و دانای بەرنامەی وەرزشكردن (2000) ئالودەبوی ماددە هۆشبەرەكان توانیویانە بەسەركەوتویی قوناغەكە تێپەڕێنن.

وتیشی: دوای شایستەبونیان بۆ تێكەڵبونەوە بە كۆمەڵگە، بەرەزامەندی محەمەد شیاع سودانی، سەرۆك وەزیرانی عێراق سەرجەمیان رەوانەی ماڵی خۆیان كراونەتەوە و ئیستا لەگەڵ كەسوكارەكانی خۆیاندا بەتەندروستییەكی باشەوە ژیانیان بەسەر دەبەن.

بەڕێوەبەری راگەیاندنی بەڕێوەبەرایەتی کاروباری ماددە هۆشبەرەکان ئاماژەی بۆ ئەوەشكرد، بەپشت بەستن بە ئەو داتا و زانیارییانەی تۆماركراون و بۆدڵنیابونەوە لەسەلامەتییان و گرتنەبەری رێكاری پێوستی ئەمنی لەكاتی پێویستدا، بەڕێوەبەرایەتی ماددە هۆشبەرەكان بەردەوام چاودێرییان دەكات.