سەرۆکی رەوتی حیکمە، داوا دەكات؛ یادی لەدایكبونی پێغەمبەری ئیسلام (د.خ) بكەن بەدەرفەت بۆ دیاریكردنی كاندیدێك بۆ سەرۆكی ئەنجومەنی نوێنەرانی عێراق و رێككەوتنی لەسەر بكرێت.

هەواڵ: (KNNC)

لە میانەی بەشداریكردنی ئاهەنگی مەولود عەمار حەكیم، سەرۆكی رەوتی حیكمە رایگەیاند: بۆ كۆتایی هاتن بە پرسی هەڵبژاردنی سەرۆكێكی نوێ بۆ ئەنجومەنی نوێنەرانی عێراق، هێز و لایەنە سیاسییەكان كە رۆژی لە دایكبونی پێغەمبەری ئیسلام (د.خ) بكەن بە دەرفەتێك بۆ رێككەوتن لەسەر دیاریكردنی كاندیدێك.

وتیشی: سەرجەم لایەنە سیاسییەكانی عێراق بەرپرسیارێتی گەورەیان لەسەر شانە و دەبێت راستگۆبن لەگەڵ هاوڵاتیانی نیشتیمانەكەیان بۆ ئەوەی بتوانن لەسەر پەیام و بەها بەرزەكانی پێغەمبەر (د.خ) بڕۆن.

سەرۆکی رەوتی حیکمە ئاماژە بۆ ئەوەشدەكات، بۆ بنیادنانی دەوڵەتێكی سەقامگیر، پێویستە هەمو پێکهاتەکانی عێراق هۆشیاربن کە نوێنەرایەتیان لە دامودەزگاکانی دەوڵەتدا هەیە، ئەوەش توانای روبەڕوبونەوەی ئاستەنگەکان و بەدیهێنانی خواستەکانی گەل بەهێزتر دەكات.