دوو پزیشکی ئەمەریکا لەپای داهێنانێکیان، خەڵاتی نۆبڵ-ی پزیشکییان بۆ ساڵی 2024 پێبەخشرا.

هەواڵ:KNNC

لیژنەی خەڵاتەکانی نۆبڵ ئەمڕۆ دووشەممە بڵاویکردەوە، (ڤیکتۆر ئامبرۆس و گاری رافکین)، پزیشکانی ئەمەریکا خەڵاتی نۆبڵ-یان لە بواری پزیشکی پێبەخشراوە، خەڵاتەکەیان لەپای دۆزینەوەی (microRNA) بەدەستهێنا کە بەشێکە لە پێکهاتەی ترشی ناوەکی و رۆڵێكی گرنگی لە رێکخستنی چالاکی بۆهێڵەکان هەیە.

لیژنەی دابەشکردنی خەڵاتەکە لە بەیاننامەیەکدا رایانگەیاندوە، "نۆبڵی ئەمساڵ بۆ دوو زانایە کە دۆزینەوە پێشەنگەکەیان بنەمایەکی تەواو نوێی رێکخستنی جینەکانی ئاشکراکرد و هۆکارێکی بنەڕەتییە بۆ زیندەوەرە فرە خانەییەکان.

لە مێژووی خەڵاتی نۆبڵدا، 114 جار بۆ بواری پزیشکی بەخشراوە و 227 کەس خەڵاتەکەیان لە ساڵە جیاوازەکاندا بردووەتەوە.

خەڵاتی نۆبڵ بەهاکەی یەک ملیۆن دۆلارە، لە میراتی داهێنەری سویدی ئەلفرێد نۆبڵ دەبەخشرێت.

براوەی خەڵاتی نۆبڵی پزیشکی لەچوار ساڵی ڕابردودا:

2024؛ ڤیکتۆر ئەمبڕۆس و گاری ڕافکین (ئەمریکا) دۆزینەوەی مایکرۆئاڕ ئێن ئەییان ڕاگەیاند، کە پۆلێکی نوێی مۆلیکولی بچووکی DNAیە و ڕۆڵێکی گرنگ دەگێڕێت لە ڕێکخستنی چالاکیی جینەکان.

2023؛ کاتالین کاریکۆ (مەجارستان) و درو وایسمان (ئەمریکا) بۆ دۆزینەوەی ڤاکسینی mRNA

2022؛ سڤانتێ پابۆ (سوید) بۆ ڕۆڵی لە دیاریکردنی ڕیزبەندی تەواوی جینۆمی نیاندەرتاڵەکان و لە دامەزراندنی ئەم پسپۆڕییەدا، کە بە لێکۆڵینەوە لە DNA لە بەردبوەکانی سەردەمی کۆن، بەدوای زانینی تایبەتمەندی جینەکانی مرۆڤ لە سەردەمی کۆندا دەگەڕێت.

2021؛ دەیڤید جولیۆس و ئاردێرم پاتاپۆتیان (ئەمریکا) بۆ دۆزینەوەکانیان لەسەر چۆنیەتی گواستنەوەی سیگناڵەکانی کۆئەندامی دەمار کە پەیوەندییان بە پلەی گەرمی و دەست لێدانەوە هەیە.

2020؛ هارڤی ئاڵتەر، چارڵز ڕایس (ئەمریکا) و مایکل هۆگتۆن (بەریتانیا) بۆ ڕۆڵی خۆیان لە دۆزینەوەی ئەو ڤایرۆسەی کە بەرپرسە لە هەوکردنی جگەری جۆری سی.