لەئەنجامی دروستبونی شۆرت لە سۆپای كارەبا، سەرجەم ئەندامانی خێزانێك لە بەغداد سوتان و گیانیان لە دەستدا.

هەواڵ: (KNNC)

میدیا عێراقییەكان لەسەر زاری هێزە ئەمنییەكان بڵاویانكردەوە: ئەمڕۆ هەینی، بەهۆی دروستبونی شۆرتی كارەبا لە سۆپایەكی كارەباییدا، ئاگر لە شوقەیەكی شاری بەغداد كەوتەوە و چوار ئەندامی یەك خێزان گیانیان لەدەستدا.

ئەوەیان خستوەتەڕو، خێزانەكە لە دایک، باوکێک و کوڕێکی چوار ساڵ و کچێکی هەشت ساڵ پێکهاتون، كەبەهۆی  شۆرتی سۆپای کارەباییەوە، ئاگر لە ماڵەکەیان كەوتەوەتەوە و بەهۆیەوە هەمویان سوتاون.

میدیا عێراقییەكان ئاماژەیان بۆ ئەوەشكردوە، روداوی ئاگر كەوتنەوەكە لە گەڕەكی سحە، كە دەکەوێتە باشوری  رۆژئاوای شاری دۆرە لە بەغدای پایتەخت و تەرمەكانیان رەوانەی پشكنین كراون.