فەرماندەیەكی سوپای پاسدارانی ئێران رایدەگەیەنێت: بەرامبەر ئەو شکستەی لە بەرەی غەززە و لوبناندا توشی بوە، ئیسرائیل هاوكاری گروپە تیرۆریستییە تەکفیرییەکان دەكات هێرشی دڕندانە بكەنە سەر سوریا.


هەواڵ: (KNNC)


جەنەراڵ حوسێن سەلامی، فەرماندەی سوپای پاسدارانی ئێران رایگەیاند: ئیسرائیل كە لە بەرەكانی جەنگی غەززە و لوبناندا شكستی هێناوە، بوەتە پێشەنگ و هاوكاری گروپە تیرۆریستییە تەکفیرییەکان دەكات كە هێرشی دڕندانە بكەنە سەر سوریا.


ئاماژەی بەوەکردوە، هێرشەكان ئیسرائیل و گروپە تیرۆرستییەكان لەلایەن سوپا و هێزە جەماوەرییەکانی سوریاوە وەڵام دراونەتەوە.


ئەو لە كاتێكدایە كە روانگەی سوری بۆ مافەکانی مرۆڤ بڵاویکردەوە؛ گروپە چەکدارەكان گەیشتونەتە قەڵای حەڵەب و ناوچەی سەراقب کە ناوچەیەکی ستراتیژییە و حەڵەب بە لازقیە و دیمەشق دەبەستێتەوە، ئەوەشخستوەتەڕو؛ كە سوپای سوریا لە ناوچەکە کشاوەتەوە تەنانەت بەبێ تەقاندانی فیشەکێك و ئەنجامدانی هیچ شەڕێك.