رێکخراوێکى مرۆیی ترسى هەیە کە زیاتر لە 40 کۆچبەر لە دەریاى ناوەڕاست بێسەروشوێن بن ئەویش دواى دۆزینەوەى یەک رزگاربوى 11 ساڵ کە لەنێو بەلەمى کۆچبەرەکان رزگارى بوە.

هەواڵ:KNNC

رێکخراوى (کۆمباس کۆلێکتڤ) کە کارى رزگارکردنى کۆچبەرانە لە دەریاى ناوەڕاست دەڵێت: پێمانوایە لەنێو بەلەمێکدا تەنها یەک کۆچبەر رزگارى بوە و 44 کۆچبەریش گیانیان لەدەستداوە.

ئاماژە بۆ ئەوەکراوە کە رۆژى چوارشەممە گروپەکانیان لە دەریاى ناوەڕاست لە دورگەى لامپیدوزا لە ئیتاڵیا گوێیان لە هاوارى منداڵێک بوە و دواى رزگارکردنى بۆیان دەرکەوتوە کە کچێکى تەمەن 11 ساڵانە بۆماوەى سێ رۆژ بوە لەنێو دەریادا ماوەتەوە و تەنها چاکەتێکى رزگارکردنى لەبەردا بوە.

بەپێی ئەو زانیارییانەى ئەو کچە 11 ساڵە داویەتییە رێکخراوەکەن بەلەمەکەیان لە تونسەوە بەڕێکەوتوە و بەهۆى ناجێگیریی کەشوهەواوە نوقمبوە و جگە لە خۆى 44 کەسى دیکەیشى لەنێودا بوە.

هاوکات ئاژانسى هەواڵى ئانسا-ى ئیتاڵى ۆرژى چوارشەممە بڵاویکردەوە کە رۆژى چوارشەممە بەلەمى کەناراوەکان بەلەمێکى تێکشکاویان دۆزیوەتەوە بێ ئەوەى هیچ لاشەیەک یاخود جل و پاشماوەیەکى مرۆڤ بدۆزنەوە.