پزیشکێکى پسپۆڕى نەخۆشییەکانى منداڵان باس لە سودەکانى ئامێرى شێدارکەرەوەى هەوا دەکات بۆ چارەسەرکردنى چەند کێشەیەکى تەندروستى و شێوازە دروستەکەى بەکارهێنانیشى ئاشکرا دەکات.

تەندروستى:KNNC

د. پشدەر عەبدوڵا، پزیشکی پسپۆڕی نەخۆشیەکانی منداڵان و تازە لەدایکبوان و کۆئەندامی هەناسە و بەرگری منداڵان سودەکانى ئامێرى شێدارکەرەوەى هەواى بەمشێوەیە باسکردوە و دەڵێت: بۆ ئەم کەسانە سودى هەیە؛


-ئەوانەی پێستیان وشکە

-چاویان هەستیاری هەیە

-وشکبونەوەی قوڕگ و کۆئەندامی هەناسەیان هەیە

-هەستیاریان هەیە لە جەستەدا

-زو زو توشی ووشکە کۆکە دەبن

-ئەوانەی زو زو توشی خوێنبەربونی لوت دەبن بەهۆی هەوای وشکەوە

-وشکبونەوە و قڵیشانی لێویان هەیە

-سەرئێشە بەهۆی تورەکە هەواییەکانی سەر

هەروەک سودەکانى ئەم ئامێرەشى بەمشێوەیە جیاکردوەتەوە؛

- کەمکردنەوەی توشبون بە نەخۆشی ئەنفلۆنزا بەتایبەتی ئەگەر رێژەی شێی هەوا زیاتر بێت لە 40%، لەبەر ئەوەى لەو رێژە شێیە ڤایرۆسەکە ناچالاک دەبێت

-نەهێشتنی وشکە کۆکە و گۆڕینی بۆ کۆکەی تەڕ بەتایبەت لەم وەرزەی ئێستادا کە کۆکەی وشک زۆر زۆرە لە منداڵاندا و بێزارکەرە بۆ منداڵەکە

-کەمکردنەوەی پرخەی خەو

-کەمکردنەوەی وشکی پێست و قڵیشانی لێو

ئەم ئامێرە لەگەڵ سودە زۆرەکانى، ئەگەر بێتو بەشێوەیەکى دروست بەکارنەیەت ئەم مەترسییانەى هەیە:

-ئەگەر ئەو ئاوەی بەکاردەهێنرێت پاک نەبێت، ئەوا دەبێتە هۆی بڵاوبونەوەی نەخۆشی.

-شێدارکردنی هەوای ماڵ زۆر باشە، بەڵام نابێت زۆر بێت، چونکە ئەگەر زۆر بێت زۆر خراپە بۆ گەشەکردنی کەڕوی ناو ماڵ و بۆ کۆئەندامی هەناسەش بەتایبەت ئەوانەی نەخۆشی ڕەبۆیان هەیە.