دەزگای لوتکە بڵاویکردەوە، لە ساڵی 2024ـدا زیاتر لە 36 هەزار کەس بەبەلەم خۆیان گەیاندوەتە بەریتانیا، بەراورد بە ساڵی رابردو رێژەکە 25% زیادی کردوە.

هەواڵ:KNNC

بەپێی ئامارێک کە دەزگای لوتکە بۆ کاروباری ئاوارە و پەنابەران بڵاویکردوەتەوە، لە ساڵی 2024ـدا 36 هەزار و 816 کۆچبەر کەناراوەکانی فەڕەنسا و کەناڵی ئینگلیزییان بەزاندوە و گەیشتونەتە بەریتانیا، بەراورد بە ساڵی 2023 بەرێژەی 25% زیادی کردوە.

ئاماژەی بەوەشکردوە، لە ساڵی 2024ـدا 76 کەس لە کەناڵی ئینگلیز گیانیان لەدەستداوە، بەوەش بوەتە خراپترین ساڵ بۆ کۆچبەران، پێنج هەزار و 800 کەس لە دەریا رزگارکراون و رێگریش لە هەوڵی پەڕینەوەی 870 کەس کراوە.

زۆرینەی ئەو کەسانەی هەوڵی چونە ناو خاکی بەریتانیان داوە هاوڵاتی وڵاتانی (ئەفغانستان، ڤێتنام، ئێران، سوریا، ئیریتریا و ڤێتنام) بون.

ئەوەش لەکاتێکدایە، حکومەتی بەریتانیا جەختدەکاتەوە لە گەڕانەوەی کۆچبەرانی نایاسایی بۆ وڵاتەکانی خۆیان، کە 29 هەزار کەس لە نێوان مانگی یەک تا سەرەتای کانونی دووەم دەگەڕێندرێنەوە.