وەزارەتى کارەبا رایدەگەیەنێت؛ خواست لەسەر کارەبا 7 هەزار و 500 مێگاواتى تێپەڕاندوە لەکاتێکدا بەرهەمهێنانى تەنها 3 هەزار و 500 مێگاواتە، دڵنیاییش دەدات بەپێی ئەو پلانانەى لەڕێی پێوەرى زیرەک و پرۆژەى روناکى 24 کاتژمێرى داینناوە دۆخەکە بەرەو باشبون دەچێت.

هەواڵ:KNNC

وەزارەتى کارەبا لە راگەیەنراوێکدا ئاشکرایکرد؛ خواست لەسەر کارەبا 7500 مێگاواتە، بەرهەمهێنان 3500، لەگەڵیشیدا 1500 مێگاوات زیادکراوە، بەڵام 460 هەزار هاوبەشى نوێی کارەبا زیادبون و خواستى کارگەکان و پرۆژەکانى وەبەرهێنان و سیتییەکانیش زیاتر بوە.

ئاماژە بۆ ئەوەشکراوە کە لە ساڵى رابردو تێکڕاى کاتى پێدانى کارەبا بە هاوبەشانى کارەبا، 12 کاتژمێر و 44 خولەک بوە.

وەزارەتەکە ئەوەشى خستوەتەڕو تێچوى بەرهەمهێنانى کارەبا و کێشە تەکنیکییەکان و هێرشە تیرۆرستییەکان بۆسەر کێڵگەکانى گاز هۆکارێکى دیکەى کەمبونەوەى کارەبا بون و کێشەیان بۆ بەرهەمهێنان دروستکردوە.



سەربارى ئەم کورتهێنانە بەرچاوە و ئەو کێشانەى وەزارەتەکە خستویەتییەڕو، بەڵام دڵنیایی دەدات لەوەى لەڕێگەی سیستەمی پێوەری زیرەك و پرۆژەی روناكی 24 كاتژمێری، دۆخی کارەبا بەرەو باشبون دەچێت.