عێراق؛ بڕیاری لەسێدارەدان بۆ 12 بازرگانی مادەی هۆشبەر دەرچو

KNN : Kurdish News Network
01:41 - 08/08/2024
عێراق
+
-

بەتۆمەتی هاوردەكردن و بازرگانیكردن بە ماددەی هۆشبەر، دادگای رەسافە (12) كەسی بە لە سێدارەدان سزادا كە یەكێك لەو كەسانە ژنێكە و رەگەزنامەی بیانیی هەیە.


هەواڵ: (KNNC)

 

میدیا عیراقییەكان ئاشكرایانكردوە، ئەنجومەنی باڵای دادوەری رایگەیاندوە: بە تۆمەتی هاوردەكردنی مادەی هۆشبەر بۆ عێراق و ساغكردنەوەی، لە دەروازەی سنوری زورباتیە پێنج كەسیان دەستگیركردوە، كە یەكێك لە دەستگیركراوەكان ژنێكی بیانییە و لەناو پێداویستیەكانیاندا بڕی (1.5) كیلۆگرام مادەی هۆشبەریان پێگراوە.

رونیانكردوەتەوە؛ بەهۆی هاوردەكرن و بازرگانی كردن بە ماددە هۆشبەرە جۆراوجۆرەكان و دەستبەسەردا گرتنی بڕی (80) گرام مادەی هۆشبەر، (50) گرام كریستاڵ و (18) حەبی (میتیلامفیتامین) سێ تۆمەتباری دیكە سزای لەسێدارەدانیان بەسەردا سەپێنراوە.

 

ئەوەیان خستوەتەڕو، چوار تۆمەتباری دیکەی مادە هۆشبەرەكان، كە لە نێویاندا ژنێک لە پارێزگای  بەسڕەوە ماددە بۆ كڕیارەكانی لە بەغدا دابین دەكات و (1.125) كیلۆگرام ماددەی هۆشبەری بەدەستەوە گیراوەو دەستگیركراون و روبەڕوی دادگاكان كراونەتەوە.

 

میدیا عێراقییەكان ئاماژەیان بۆ ئەوەكردوە، دادگا بڕیاری لەسەر هەرسێ دۆسییەكە و (12) تۆمەتبارەکە داوە، كەبەپێی بڕگەکانی مادەی (27ـی یەكەم) لە یاسای ماددە هۆشبەرەکان و ماددە دەرونییەکان بە ژمارە (50ـی ساڵی 2017) و بەپێی مادەکانی (47-48-49) لە یاسای سزادان، بڕیاری لە سێدارەدانیان بۆ دەرچوە.

318 جار خوێندراوەتەوە