بە هەوڵی ئەمەریکا، ژنێکی ئێزدی لە کەرتی غەززە رزگار کرا و چالاکوانێکی پرسەکەش چیرۆکی ئەو ئێزدییە بە قورسترین و تراژیدیترین کەیسی ژیانی ناودەبات.

هەواڵ:KNNC


وەزارەتی دەرەوەی ئەمەریکا رایگەیاند: توانیویانە بە سەرکەوتویی ژنێکی ئێزدی بە ناوی فەوزییە سەیدۆ رزگار بکەن کە قوربانی دەستی داعشە و ماوەی 11 ساڵە لەپاش هێرشی چەکدارانی رێکخراوی داعش بۆسەر شنگال رفێندراوە.

بەپێی ڕاپۆرتێکی دەنگی ئەمەریکا، پێرێ ئەو ژنە بە ئەمبوڵانسێکی ئەمەریکی لە غەززەوە گوازراوەتەوە بۆ ئیسرائیل و دواتر بۆ باڵیۆخانەی ئەمەریکا لە ئۆرشەلیم, دواتر بۆ ئوردن و دوێنێش لەڕێگەی فڕۆکەیەکەوە گەیشتە بەغداد و لەلایەن تیمێکی هەواڵگری عێراقییەوە بەرەو موسڵ بەڕێکرا و لەوێوە راستەوخۆ گەڕایەوە بۆ زێدی خۆی لە شنگال.

لە راپۆرتەکەدا هاتوە، فەوزییە لە ساڵی 2014 و لە تەمەنی 10 ساڵیدا رفێنراوە، لە پاش مامەڵەکردن لەگەڵی وەک کۆیلەی سێکسی، دراوە بە چەکدارێکی فەڵەستینی داعش و دواتر بوەتە خاوەنی دو منداڵ.

ستیڤ مامان کە چالاکوانێکی جولەکەیە و کار لەسەر پرسی رفێندراوە ئێزدی و مەسیحییەکانی دەستی داعش دەکات رایگەیاندوە، کەیسەکەی فەوزییە، قورسترین و تراژیدیترین کەیسە کە تا ئێستا کاری لەسەر کردبێت و بەوپێیەی دەبو حکومەتەکانی ئەمەریکا و ئیسرائیل و عێراق تیایدا بەشداربن، خراپی پەیوەندی عێراق و ئیسڕائیل یاساکانی بەغداد بەربەستێکی گەورە بون لەبەردەم رزگارکردنیدا.