هەسەدە رایگەیاند، لە دوو رۆژی رابردو لە ئەنجامی شەڕ و پێکدادانی نێوان هێزەکان و تورکیا و گروپە هاوپەیمانەکانی، نزیکەی 60 چەکدار کوژراون و بریندار بون، بۆردومان و تۆپبارانی تورکیا و گروپە چەکدارە هاوپەیمانەکانی بۆسەر کانتۆنی کۆبانێ و جەزیرە و مەنبج بەردەوامە.

هەواڵ:KNNC

هێزەکانی سوریای دیموکرات (هەسەدە)، سەبارەت بە شەڕ و پێکدادانەکان لە بەرەکانی باشور و رۆژهەڵاتی مەنبج راگەیەنراوێکی بڵاوکردوە و تێێدا هاتوە، لە رۆژی هەینییەوە شەڕێکی قورس لە نێوان شەڕڤانان و چەکدارانی نزیک لە تورکیا لەبەرەکانی باشوری مەنبج هەیە، بەوهۆیەوە 23 چەکداری سەر بەو گروپانە کوژراون و 36 کەسی دیکەش بریندار بون.

هەسەدە ئاماژەی بەوەشکرد، سەڕەڕای توندی شەڕەکە و بۆردومانی فڕۆکە جەنگیەکان و فڕۆکەبێفڕۆکەوانەکانی تورکیا شەڕڤانان بەرخۆدانی مێژوییان لەدژی چەکداران ئەنجامدا و لە ماوەی دو ڕۆژدا، سێ شەرڤان شەهید بون.

لەلایەکی دیکەوە، بەگوێرەی میدیاکانی ڕۆژئاوای کوردستان، تورکیا بە فڕۆکەی جەنگی و فڕۆکەی بێفڕۆکەوان گوندکانی سەپەت و گری بەرکەلی لە باشوری کۆبانێ و دەوروبەری بەنداوی تشرین بۆردومانکرد و چەندین گوندیش لە کانتونی مەنبج و جزیرە بە چری تۆپبارانکرد.