بەڕێوەبەرایەتی گشتی بەرگری شارستانی هەرێمی کوردستان بۆ رۆژانی جەژن سەرجەم تیمەكانیان خستوەتە حاڵەتی ئامادەباشییەوە و دەڵێت: لەکاتی ڕودانی هەر ڕوداوێکی نەخوازراو  پەیوەندی بەژمارە (115) بکە بۆئەوەی تیمەکان بەزوترین کات بگەنە شوێنی روداوەكە

هەواڵ: (KNNC)


بەڕێوەبەرایەتی گشتی بەرگری شارستانی هەرێمی کوردستان بڵاوکردەوە؛ بەبۆنەی هاتنی جەژنی پیرۆزی رەمەزان، سەرجەم هێزەکانی بەرگری شارستانی هەرێمی کوردستانی خستە حاڵەتی ئامادەباشییەوە و بۆ ئەو مەبەستەش سەرجەم بنکەکانی ناو شار و دەرەوی شار لە ئێشکگری تەواو دا دەبن هەروەها ⁠تیمی گەڕۆک بەردەوام لە شوێنە گشتییەکانی ناو شار و بازارەکان دەبن.

ئەوەشیخستوەتەڕو، لەکاتی ڕودانی هەر ڕوداوێکی نەخوازراو  پەیوەندی بەژمارە (115) بکە بۆئەوەی تیمەکان بەزوترین کات بگەنە شوێنی روداوەكە .

دەقی راگەیاندراوەکە:

 هاونیشتمانیانی ئازیز بەبۆنەی هاتنی جەژنی رەمەزانی پیرۆز و پشوەکانی ئەم جەژنە لە رۆژی (29/3 بۆ 5/4) سەرجەم هێزەکانی بەرگری شارستانیی لەتەواوی هەرێمی کوردستان خراونەتە حاڵەتی ئامادەباشییەوە بەمەبەستی پاراستنی سەرو مالی هاولاتیان و جێ بەجێ کردنی پلانی جەژنی رەمەزانی پیرۆز بەم شێوەیە:

1-سەرجەم بنکەکانی ناو شار و دەرەوی شار لە ئێشکگری تەواو دا دەبن.
2-⁠تیمی گەڕۆک بەردەوام دەبن لە شوێنە گشتییەکانی ناو شار و بازارەکان.
3-بەهەماهەنگئ لەگەل دیوانی پارێزگاکان و دەستەی گەشتوگوزار ناوچە گەشتیاریەکان تیمی گەڕۆکی لێ جێگیر دەکرێت بۆ پاراستنی گەشتیاران.

رێنماییەکان: هانیشتیمانی ئازیز بۆ سەلامەتی خۆت تکایە پەیڕەوی ئەم ڕێنماییانە بکە :

1- لەکاتی ڕودانی هەر ڕوداوێک سەرەتا پەیوەندی بە ژمارە (115) بکە بۆئەوەی تیمەکانی بەرگری شارستانیی بەزوترین کات بگەنە شوێنی روداوەكە.
2- ئەگەر بەمەبەستی گەشت و سەیران لەماڵ دەرچویت باشترە هەمو ئامێرە کارەباییەکان بکوژێنرێتەوە، چونکە لە ماوەی رابردو زۆرترین حالەتی سوتانی ماڵان رویداوە بەهۆی شۆرتی کارەباوە .
3- ناوچە گەشتیاریەکان بپارێزە وریای پاشماوەی ئاگری چێشتلێنان بن بەتەواوی بیکوژێنەوە کە کارت پێی نەما .
4- ⁠خەڵوزی نێرگەلە هۆکاری سەرەکین بۆ کەوتنەوەی ئاگر لە ماڵان و ناوچە گەشتیاریەکان بۆیە بە وریایەوە بەکاریبێنە .
5- ⁠بەهۆی کەمی باران بارین لەم ساڵدا وشکی خاک و بونی پوش و پەلاش فڕێدانی جگەرە مەترسیدارە، بۆیە کە جگەرەکەت کێشا لە جامی ئۆتۆمۆبیلەکەت فڕێی مەدە دەرەوە بەتایبەتی لە ڕێگاکانی دەرەوەی شار.
6- ⁠خاوەن هوتێل و موتێلەکان و شوێنە گەشتیاریەکان دەبێت بەتەواوی رێنماییەکانی بەرگری شارستانی جێبەجێ بکەن کە پێیان دراوە، چونکە پاڵەپەستۆیەکی زۆریان لەسەر دەبێت بەهۆی هاتنی گەشتیارانی ناوەراست و خواروی عێراق .
7- ⁠شەقامەکانی دەرەوەی شار قەرەباڵغ دەبن تکایە؛ لە کاتی لێخوڕینی ئۆتۆمۆبیل پەیڕەوی ڕێنماییەکانی برایانی پۆلیسی هاتوچۆ بن بۆ سەلامەتی خۆت و گشتیی .
8- ⁠لەو ناوچانەی ئاوی لێیە تکایە مەلە مەکەن ژیانی خۆت مەخەرە مەترسیەوە .
9- ⁠دایکان و باوکان تکایە؛ ئەگەر بەمەبەستی گەشت چونە دەرەوە ئاگاداری منداڵەکانتان بن لەو شوێنانەی ئاوی لێیە، با روداوە ناخۆشەکانی ساڵانی رابردو دوبارە نەبنەوە .
10- لەهەمو بارودۆخێکدا تکایە بەزوترین کات پەیوەندی بکەن بە هێلی گەرمی بەرگری شارستانیی ژمارە (115)ـوە بكەن.