سەرباری كۆتایی هاتنی وادە دیاریكراوەكەی ویلایەتە یەكگرتوەكانی ئەمەریكا بۆ هاوردەكردنی غازی ئێران لەلایەن عێراقەوە، بەڵام تا ئەمڕۆ دوشەممە، هاوردەكردنەكە بەردەوامە.


هەواڵ: (KNNC)


مەهدی ساڵح، بەڕێوەبەری گشتی بەرهەمهێنانی كارەبا لە وەزارەتی كارەبا لە باشوری عێراق رایگەیاند: بەمەبەستی دابینكردنی غاز بۆ وێستگەكانی بەرهەمهێنانی تەزوی كارەبا بۆ هاوڵاتیانی خواروی عێراق، هاوردەكردنی غاز لە ئێرانەوە بەردەوامەوە.


وتیشی: لە رۆژی (8ـی ئازاری 2025)ـوە وادەی رێگەپێدانەكەی ئەمەریكا بۆ هاوردەكردنی غازی ئێرانی لەلایەن عێراقەە كۆتایی هاتوە، بەڵام تا ئێستا بەفەرمی هیچیان بەدەست نەگەیشتوە كە هاوردەكردن رابگیرێت.


پێشتر و دوای دەستبەكاربونەوەی دۆناڵد ترەمپ، سەرۆكی ویلایەتە یەكگرتوەكانی ئەمەریكا رایگەیاندبو، بەمەبەستی رێگری كردن لە گەیشتنی هاوكاری دارایی بۆ تاران، پێویستە عێراق لە ماوەی دیاریكراودا هاوردەكردنی وزە لە ئێرانەوە رابگرێت.