بەڕێوەبەرایەتی گشتی ماددە هۆشبەرەکانی سەربەوەزارەتی ناوخۆی عێراق رایدەگەیەنێت: لەسەرەتای ساڵی (2025)ـوە تا ئێستا توانیویانە دەستبەسەر زیاتر لە دو تۆن مادەی هۆشبەردا بگرن لەگەڵ  دەستگیرکردنی (559) بازرگانی ناوخۆیی و نێودەوڵەتی.

هەواڵ: (KNNC)

حسێن یوسف تەمیمی، وتەبێژی بەرێوەبەرایەتی گشتی ماددە هۆشبەرەکان و ماددە دەرونییەکان رایگەیاند: بەهۆی پەیوەندی راستەوخۆی بەڕێوەبەرایەتییەكەیان لەگەڵ  وەزیری ناوخۆ، توانیویانە لەسەرەتای ئەمساڵەوە تا ئەمڕۆ هەزار و (559) بازرگانی ماددە هۆشبەركان دەستگیربكەن، بەوەش زیانی گەورەیان لەبازرگانانی نێودەوڵەتی و ناوخۆیی داوە.

وتیشی: لەماوەی ساڵی (2025)ـدا بەڕێوەبەرایەتی ماددە هۆشبەرەكان دەستی بەسەر دو تۆن و (156) كیلۆگرام ماددەی هۆشبەردا گرتوە، هەروەها توانیویانە (194) بازرگانی نێودەوڵەتی و هەزار (356) بازرگانی ناوخۆیی ماددە هۆشبەرەکان دەستگیربكەن.

وتەبێژی بەرێوەبەرایەتی گشتی ماددە هۆشبەرەکان و ماددە دەرونییەکان ئاماژەی بۆ ئەوەشكردوە، بەڕێوەبەرایەتییەکە توانیویەتی نەك تەنها لەناوخۆی وڵات بەڵكو لە ئاستی ناوچەیی و نێودەوڵەتیشدا چالاكییەكانی پێشبخات ئەوەش وایكردوە هەمیشە بەڕێوەبەرایەتییەكەی بەهێزتر و کاریگەرتر روبەڕوی گواستنەوە و قاچاخچێتی ماددە هۆشبەرەكان بەبەكارهێنانی هۆكار و ئامرازی مۆدێرنی پێشکەوتو بوەستێتەوە.