لە دو ساڵی رابردودا هەناردەی نەوتی عێراق بۆ ئەمەریكا بەرێژی لە (110%) زیادی کردوە و هاوسەنگی بازرگانی بە ڕێژەی (5.7) ملیار دۆلار لە بەرژەوەندی بازرگانی بەغدادایە.

هەواڵ: (KNNC)


مەزهەر محەمەد ساڵح، راوێژکاری دارایی سەرۆک وەزیرانی عێراق رایگەیاند: پەیوەندی ئابوری نێوان عێراق و ویلایەتە یەكگرتوەكانی ئەمەریكا لە بوارەكانی وەبەرهێنان، بازرگانی و ئابوری و بوارە جۆربەجۆرەكانی دیكە پێكهاتوە بەردەوامیش رو لە زیادبون دەكات، لە دو ساڵی رابرودشدا هەناردەی نەوت بەرێژەی (110%) زیادیكردوە و ئێستا ئاڵوگۆڕە بازرگانییەكانی نێوان هەردو وڵات لە نێوان نۆ بۆ (10) ملیار دۆلاردایە.

وتیشی: ئەو كاڵاوشمەكانەی لەلایەن عێراقەوە هاوردە دەكرێن، بەپلەی یەکەم لە ئۆتۆمبێل و کەرەستەی گواستنەوە و ئامێری ئەندازیاری و کارەبادا بوە و هاوسەنگی بازرگانی بەڕێژەی (5.7) ملیار دۆلار لە بەرژەوەندی بازرگانی بەغدادایە كە ئەمەش ڕەنگدانەوەی بەردەوامی باڵادەستی هەناردەی عێراقە بۆ ئەمەریکا بەتایبەتی لە کەرتی نەوتی خاودا.

ئاماژەی بۆئەوەشكرد، پشتگیركردنی دارایی و ئابوری بەشێکە لە دیالۆگێکی ئەرێنی هاوبەشی نێوان هەردو وڵات كە لە سەرەتای ئەمساڵەوە چەندین لێکتێگەیشتنی هاوبەش لە بواری هاوکاری و ئابوریدا ئەنجامدراون كە هاوتەریبن لەگەڵ بەرنامەی حکومەت بۆ چاکسازییە ئابورییەکان بەتایبەتی پەرەپێدانی ژینگەی وەبەرهێنان لە نێوان هەردو وڵاتی دۆستدا.