مەهەپە و دەپارتی، سەردانی یەکتریان کرد و هەردولا جەختیان لەسەر گرنگی پڕۆسەی چارەسەریی کردەوە، ئەندامانی دەمپارتی نیگەرانییان لەبارە دەستگیرکردنی هاوڵاتییان و دەستگیرکردنی سەرۆک شارەوانییەکان دەربڕی.

هەواڵ:KNNC

 ئەمڕۆ شاندێکی دەمپارتی بە مەبەستی پیرۆزبایی جەژن و بە سەرۆکایەتی ئایشەگوڵ دۆغان وتەبیژی دەمپارتی، سەردانی بارەگای سەرەکی مەهەپەیان کرد و هەر ئەمڕۆ شاندێکی پارتی نەتەوەپەرسی تورکیا-مەهەپە بە سەرۆکایەتیی ئیسمەت بویوکتامان، سکرتێری گشتیی پارتەکە مەبەستی سەردانی بارەگای سەرەکیی دەمپارتیان کرد لە ئەنقەرە.

لە دیدارەکانی نێوانیاندا، ئایشەگوڵ ڕایگەیاند: دوای بانگەوازەکەی عەبدوڵڵا ئۆجالان، تورکیا لەبەردەم دەرفەتێکی مێژوییدایە و کۆمەڵگەی تورکی لە شەڕ بێزارە، بەدیهێنانی ئاشتی گرنگە و نابێت تورکیا ئەو دەرفەتە لەدەستبدات، دەبێت دیموکراسیی و ئاشتی و یەکسانی و دەستەبەری مافی پیکهاتە جیاوازەکان دوانەخرێت.

ئەندامانی دەمپارتی نیگەرانی خۆیان لەبارەی ئاڵۆزییەکانی تورکیا و دەستگیرکردنی خۆپیشاندەران و مانەوەی سەرۆکشارەوانیی و زیندانیانی سیاسی دەربڕی.

لای خۆشییەوە، زوهال تۆپچو جێگری سەرۆکی مەهەپە ڕایگەیاند: پەیامەکەی دەستپێشخەرییەکەی دەوڵەت باخچەلی ئاشتیی و چارەسەری گرنگە و پڕۆسەکە قۆناغی باشی بڕیوە دەبێت هەموان پێکەوە هەوڵی بە ئامنجگەیشتی چارەسەریی و تورکیای بێشەڕ و تیرۆر بدەن.